गोरखापत्र
नवलपुरमा गठबन्धनमा सहमति नहुँदा आ–आफ्नै उमेदवारी दिँदै
सोमबार ५ बजेसम्म मनोनयन दर्ता गरिसक्नु पर्ने भएकोले सत्ता गठबन्धन दलहरुबीच सहमति नजुटेपछि आ–आफ्नो ढंगले उमेदवारी दिने तयारीमा जुटेको हो । पूर्वी नवलपरासीमा सत्ता गठबन्धनमा अझै कुरा मिल्न सकेको छैन तथापि माओवादी केन्द्रले गठबन्धनसँग तालमेल मिल्ने गरी उमेदवारी दिने तयारी गरेको छ ।
पत्रकार महासंघका केन्द्रीय सदस्य आङबुहाङले दिनुभयो राजिनामा
काठमाडौं, बैशाख १२ गते । नेपाल पत्रकार महासंघकी केन्द्रीय सदस्य शान्ता आङबुहाङले पदबाट राजिनामा दिनुभएको छ । स्थानीय तहको निर्वाचनमा आठराई त्रिवेणी गाउँपालिकाको उपप्रमुख पदमा मनोनयन गर्ने तयारी गर्नुभएसँगै लिम्बुले पदबाट राजिनामा दिनुभएको नेपाल पत्रकार महासंघका अध्यक्ष विपुल पोखरेलले जानकारी दिनुभयो । प्रेस स्वतन्त्रताको मर्मलाई मध्यनजर गरी आङबुहाङले राजिनामा दिनुभएको पत्रमा उल्लेख छ । यस अघि महासंघकी केन्द्रीय उपाध्यक्ष वाला अधिकारीले नेपाली कांग्रेसको केन्द्रीय सदस्यमा मनोनयन दिनुभएसँगै राजिनामा दिनुभएको थियो ।
गुल्मीका १५ मतदान स्थल अति संवेदनशील, ४१ संवेदनशील
तिलाचन पाण्डेतम्घास, वैशाख १२ गते । गुल्मीका १५ वटा मतदान स्थल अति संवेदनशील रहेको जिल्ला सुरक्षा समिति गुल्मीले जनाएको छ ।जिल्लाको कालीगण्डकी ,मालिका ,मदाने ,सत्यवती र चन्द्रकोट गाउँपालिकाका गरी १५ वटा मतदान स्थल अति संवेदनशील रहेको जिल्ला सुरक्षा समिति गुल्मीका प्रमुख तथा प्रमुख जिल्ला अधिकारी पुण्यविक्रम पौडेलले जानकारी दिनुभयो । यस्तै ४१ वटा मतदान स्थल संवेदनशील र ८६ वटा मतदान स्थल सामान्य रहेको उहाँले जानकारी दिनुभयो । संवेदनशील स्थलहरुमा सुरक्षा लगायत अन्य हिसावले पनि सबै प्रबन्ध मिलाइएको उहाँले जानकारी दिनुभयो । शान्ती सुरक्षाका हिसावले आफूहरुले सबै प्रबन्ध मिलाएको र निर्वाचनलाई भयरहित वातावरणमा सम्पन्न गर्नका लागि आफूहरु सक्षम रहेको पौडेलले दाबी गर्नुभयो । मतदान स्थलहरुलाई वर्गीकरण गर्दा भगोल, यातायात, जिल्लागत सीमा लगायतका विषयहरुलाई आधार मानेर वर्गीकरण गरिएको हो ।जिल्लामा कुल १४२ मतदान स्थल छन् भने मतदान केन्द्र भने २७९ रहेको जिल्ला निर्वाचन कार्यालयले जनाएको छ । जिल्लामा सबैभन्दा कम इस्मा गाउँपालिकामा आठ वटा मतदान स्थल छन् भने सबैभन्दा बढी सत्यवती गाउँपालिकामा १६ मतदान स्थल रहेको निर्वाचन कार्यालयका नायबसुब्बा मेघलाल पाण्डेले जानकारी दिनुभयो ।कालीगण्डकी र मदाने गाउँपालिकामा १०-१०, गुल्मीदरबार, रुरुक्षेत्र र मालिका गाउँपालिकामा ११-११, चन्द्रकोट गाउँपालिकामा १४ तथा छत्रकोट गाउँपालिकामा १० मतदान स्थल छन् । त्यस्तै धुर्कोट गाउँपालिकामा ११ एवम् मुसिकोट र रेसुङ्गा नगरपालिकामा १५-१५ वटा मतदान स्थल रहेको पाण्डेले बताउनुभयो । गुल्मीमा कुल दुई लाख २४ हजार २७६ मतदाता रहेको कार्यालयले जनाएको छ । जसमा महिला एक लाख १४ हजार २५१ , पुरुष एक लाख १० हजार ५९ र २ जना अन्य रहेको कार्यालयले जनाएको छ ।
गुल्मीमा एमालेले लगायो उम्मेद्वारको नामावली, गठबन्धनको बाँकी
तिलाचन पाण्डे गुल्मी, वैशाख १२ गते । नेकपा (एमाले) ले वैशाख ३० गते स्थानीय तहको निर्वाचनका लागि उम्मेद्वारहरुको टुङ्गो लगाएको छ । एमालेले रेसुङ्गा नगरपालिकाको प्रमुखमा राजेन्द्र पाण्डे र उपप्रमुखमा रीता पाण्डेलाई सिफारिस गरेको छ । यस्तै मुसिकोट नगरपालिकामा जीवन खरेल प्रमुख र उपप्रमुखमा गङ्गा श्रेष्ठलाई सिफारिस गरेको नेकपा एमाले गुल्मीका सचिव गणेश श्रीपालीले जानकारी दिनुभयो । यस्तै जिल्लाको कालीगण्डकी गाउँपालिकामा अध्यक्षका लागि रामजी ढकाललाई सिफारिस गरेको छ भने उपाध्यक्षको टुङ्गो लगाउन बाँकी रहेको उहाँले जानकारी दिनुभयो । सत्यवती गाउँपालिकामा अध्यक्षमा टीकारम पाण्डे र उपाध्यक्षमा निरमाया राहादी रहनुभएको छ । चन्द्रकोट गाउँपालिकामा अध्यक्षमा चेतन बस्नेत र उपाध्यक्षमा यस अगाडिकै राधिका अर्याललाई पुनः सिफारिस गरेको छ । रुरु क्षेत्र गाउँपालिकामा अध्यक्षका लागि हिमाल श्रेष्ठ र उपाध्यक्षका लागि मिना गौतम रहनुभएको छ । छत्रकोटमा अध्यक्षका लागि रामप्रसाद पाण्डे र उपाध्यक्षमा सावित्रा ज्ञवाली रहनुभएको छ । गुल्मीदरबार गाउँपालिकामा अध्यक्षमा कृष्ण भुसाल र उपाध्यक्षमा सुशीला पुन , इश्मा गाउँपालिकामा अध्यक्षमा हीरा एसी र उपाध्यक्षमा यस अगाडिकै विमला मालिका गाउँपालिकामा यस अगाडिकै अध्यक्ष रितबहादुर थापा हुनुहुन्छ भने उपाध्यक्षमा रनमाया पुन रहनुभएको छ । मदाने गाउँपालिकामा अध्यक्षका लागि प्रेम केशी र उपाध्यक्षमा यस अगाडीकै सरिता खडका रहनुभएको छ । धुर्कोट गाउँपालिकामा भने अहिलेसम्म कसलाई सिफारिस गर्ने भन्ने बारेमा टुङ्गो लागेको छैन । अहिले पनि धुर्कोटको बारेमा छलफल भइराखेकाले केही समयमै टुङ्गो लगाइने श्रीपालीको भनाइ छ । यता गठबन्धनले भने रेसुङ्गामा काँग्रेसका जिल्ला सभापति खिलध्वज पन्थीलाई प्रमुखमा र अमृता कुँवरलाई उपप्रमुखमा पठाउने निर्णय गरेको छ । मुसिकोटमा गठबन्धनबाट काँग्रेसका हरिनारायण सापकोटा र उपप्रमुखमा समाजवादीका नेता श्रीराम महत रहने भएका छन् । मालिका गाउँपालिकामा गठबन्धनको तर्फबाट माओबादीबाट देवीराम अर्याल अध्यक्ष र उपाध्यक्षमा काँग्रेसका उपेन्द्र अर्यालले आइतबार नै मनोनयन दर्ता गराई सक्नुभएको छ । गठबन्धनले अझै अन्य केही स्थानीय तहको बारेमा भने टुङ्गो लगाउन बाँकी छ ।
लिभरपुलको उपाधि दौड कायम
एभर्टनमाथि सहज जित निकाल्दै लिभरपुलले इङ्लिस प्रिमियर लिगको उपाधि दौड कायम राखेको छ । घरेलु मैदानमा आइतबार राति भएको खेलमा लिभरपुलले एभर्टनलाई २–० गोलले हरायो ।
सिरी ‘ए’ उपाधि होड रोचक
इटालियन सिरी ‘ए’ लिग फुटबलको उपाधि होड रोचक बनेको छ । आइतबार राति भएको खेलमा लाजियोलाई उसैको मैदानमा २–१ गोलले हराउँदै एसी मिलान शीर्षस्थानमा उक्लिएको छ ।
बार्सिलोनालाई रायो भालेकानोको धक्का
स्पेनिस ला लिगाको उपाधि दावेदार बार्सिलोनालाई रायो भालेकानोको धक्का लागेको छ । घरेलु मैदानमा आइतबार राति भएको खेलमा बार्सिलोना रायो भालेकानोसँग १–० गोलले पराजित भयो ।
नेपाली चलचित्र ‘कान्स महोत्सवमा’
अविनाशविक्रम शाहको छोटो चलचित्र कान्स फिल्म फेस्टिभलमा छानिएको छ । कान्सले सार्वजनिक गरेका चलचित्रमध्ये शाहले निर्देशन गर्नुभएको ‘लोरी’ छनोट भएको हो । योसँगै नेपालबाट प्रतिस्पर्धात्मक विधामा छनोट हुने ‘लोरी’ पहिलो चलचित्र बनेको छ ।
उमेदवारी मनोनयनको दोस्रो दिन विराटनगरमा चहलपहल बढ्यो
धीरज दाहालविराटनगर, वैशाख १२ गते । स्थानीय तह निर्वाचनका लागि मनोनयनको दोस्रो तथा अन्तिम दिन विराटनगरमा राजनीतिक चहलपहल बढेको छ । मुख्य राजनीतिक दलहरुका उम्मेदवारहरुले आज उमेदवारी मनोनयन दर्ता गर्ने भएकाले पनि विराटनगरका बिभिन्न चोकहरुमा राजनीतिक दलहरुका कार्यकर्ताहरुको भिडभाड बढ्न थालेको छ ।उम्मेदवारी दर्ताको पहिलो दिन विराटनगरमा बिशेषतः स्वतन्त्र उम्मेदवार र साना राजनीतिक दलहरुबाट उम्मेदवारी दर्ता भएको थियो । विराटनगरस्थित मुख्य निर्वाचन अधिकृतको कार्यालयले दिएको जानकारीअनुसार महानगर प्रमुखमा ३ जना सहित ५७ जनाले उम्मेदवारी दर्ता गराएका छन् । कार्यालयले दिएको जानकारीअनुसार महानगरको प्रमुखमा स्वतन्त्र उम्मेदवारहरु उमेश यादव र सक्रिय गौतमले उम्मेदवारी दर्ता गराउनुभएको छ । त्यसैगरी जनमत पार्टीकातर्फबाट अरुणकुमार मण्डलले समेत महानगर प्रमुख पदमा उम्मेदवारी दर्ता गराउनुभएको छ । त्यसैगरी वडाध्यक्षमा १८ र वडा सदस्यमा ३६ जनाले मनोनयन दर्ता गराउनुभएको छ ।आसन्न स्थानीयतहको निर्वाचनका लागि विराटनगर महानगरपालिकामा मुख्य दलहरुबाट उम्मेदवार छान्न सकस परेकाले पनि नेपाली काँग्रेस, नेकपा एमाले लगायतका ठूला दलहरुबाट उम्मेदवारी दर्ता हुन सकेको छैन । एमालेले बिराटनगरको मेयरमा सागर थापा र उपमेयरमा शिल्पा निराला कार्कीलाई उम्मेदवार बनाउने निर्णय गरेको छ । काँग्रेसले प्रमुख पदमा यो समाचार तयार पार्दासम्म कुनै पनि नाममा निर्णय गरिसकेको छैन । विराटनगरस्थित मुख्य निर्वाचन अधिकृतको कार्यालयले दिएको जानकारीअनुसार बिहान १० बजेदेखि बेलुकी ५ बजेसम्म कार्यालयले तोकिए बमोजिमको प्रक्रिया पूरा गरी उम्मेदवारी मनोनयन दर्ता गराउनेछ ।
अछाममा दुई मेयरका उम्मेद्वार बन्दै
शिवराज ढुङ्गाना अछाम, वैशाख १२ गते । स्थानीय तहको निर्वाचन–२०७९ मा अछाममा दुई महिला नगरपालिकाको प्रमुखमा उम्मेद्वारी दर्ता गराउने भएका छन् । नेकपा (एमाले) बाट साँफेबगर नगरपालिकाको प्रमुखमा पशुपति कुँवर र नेपाली काँग्रेसबाट पञ्चदेवल विनायक नगरपालिकामा अम्बिका चलाउने उम्मेद्वार बन्ने हुनुभएको छ ।चलाउने पञ्चदेवल विनायक नगरपालिकामा हाल उपप्रमुख र नेपाली काँग्रेसको सुदूरपश्चिम प्रदेश सहमहामन्त्री हुनुहुन्छ । कुँवर नेकपा (एमाले) जिल्ला सदस्यमा क्रियाशील हुनुहुन्छ । दुई पार्टीले स्थानीय तहको निर्वाचनमा उम्मेद्वारीको नामावली सार्वजनिक गरेसँगै दुई महिला मेयरमा उम्मेद्वारी चर्चा चल्न थालेको छ । यस्तै नेकपा (एमाले) अछामले चौरपाटी गाउँपालिकामा दलिततर्फबाट प्रतिनिधित्व हुने गरेर उम्मेद्वारी दर्ता गरिने एमाले अछामका अध्यक्ष चन्द्रबहादुर बोहराले जानकारी दिनुभयो । चौरपाटी गाउँपालिकामा एमाले जिल्ला सदस्य रामबहादुर आउजी अध्यक्षमा चुनाव लड्ने बताइएको छ । अन्य स्थानीय तहमा अधिकांशमा महिला उपप्रमुख÷उपाध्यक्षमा चुनाव लडाउने राजनीतिक दलको तयारी छ ।
नयाँघरेको ‘याकजी’
निबन्धकार तथा नियात्राकार युवराज नयाँघरेको ‘याकजी’ निबन्ध सङ्ग्रहको विमोचन भएको छ । प्राज्ञ तथा नाटककार अशेष मल्लले विमोचन गर्नुभएको उक्त नियात्राका कृति तल्लो र माथिल्लो डोल्पाको भूगोल, संस्कृति, जनजीवन र विकटताको वर्णन छ । यो कृति यात्रा मात्रै नभएर सामाजिक रूपमा गहिरो अध्ययन गरिएको विशेष ग्रन्थ हो, नाटककार मल्लले भन्नुभयो ।’
एमालेले टुङ्ग्यायो विराटनगरको प्रमुख र उपप्रमुख
नेकपा (एमाले) ले विराटनगर महानगरपालिकामा प्रमुख र उपप्रमुख उम्मेदवारीको नामवली टुंगो लगाएको छ । आइतबार अवेरसम्म बसेको बैठकले प्रमुखमा सागर थापा र उपप्रमुखमा सिल्पा निराला कार्कीको नाम टुंगो लगाएको नेकपा (एमाले) का सचिव रुपेश खतिवडाले जानकारी दिनुभयो ।
लुम्बिनी गुरुयोजना पूरा हुने दिशातर्फ
लक्ष्मण पौडेलभैरहवा, वैशाख १२ गते । लुम्बिनी विकासको गुरुयोजना अब पूरा हुने दिशातर्फ अगाडि बढेको छ । स्रोत व्यवस्थापन भएकाले अबको दुई वर्षमा गुरुयोजनाको काम सम्पन्न हुने लुम्बिनी विकास कोषको दाबी छ ।कोषका उपाध्यक्ष अवधेश त्रिपाठीले भन्नुभयो, “नेपाल सरकारले दुई वर्षमा गुरुयोजना सम्पन्न गर्ने भनेर आर्थिक स्रोत सुनिश्चित गरिसकेको छ, गएको आर्थिक वर्षबाट तीव्रताका साथ बाँकी काम भइरहेका छन् । यो आर्थिक वर्षमा झन्डै चार अर्बको काम गरिरहेका छौँ ।” गुरुयोजनाअनुसारको संरचना निर्माण दुई वर्षमा सम्पन्न गर्न ठेक्का प्रक्रिया अगाडि बढेको उहाँले जानकारी दिनुभयो ।गुरुयोजनामा उल्लेख भएअनुसार अहिलेसम्म लुम्बिनीको सुरक्षालाई ख्याल गरी १६ किलोमिटरको सुरक्षा पर्खाल, केन्द्रीय नहर निर्माण, पवित्र क्षेत्र, अन्तर्राष्ट्रिय विहार क्षेत्र, केन्द्रीय नहर, लिङ्क पोखरी निर्माणका काम सम्पन्न भइसकेका छन् । यसैगरी शौचालय निर्माण, विद्युतीकरण, पैदलयात्री हिँड्ने बाटो, भित्री बाटो कालोपत्रे, विभिन्न विहार निर्माण, विभिन्न महŒवपूर्ण भवन, ढल निकास, प्रशासनिक भवन, सूचना केन्द्र, सङ्ग्रहालय, पुस्तकालय, सङ्ग्रहालय, मायादेवी वरिपरि पोखरी निर्माण, १४ लाख लिटर क्षमताका दुईवटा पानी ट्याङ्की निर्माण, सीसीक्यामरा जडान, कोषको भवन, आवासगृह निर्माणलगायतका संरचनाको काम पूरा भएको कोषले जनाएको छ ।लुम्बिनी विकास कोषका अनुसार जापानी वास्तुकलाविद् प्रोफेसर केन्जो टाङ्गेको गुरुयोजनाबमोजिम अब मुख्य छवटा ठूला काम बाँकी रहेका छन् । डोम आकारका छवटा भवनसहितको संरचना, सौन्दर्यीकरण, फोहोरमैला व्यवस्थापन र ढल निकास, नाली व्यवस्थापन, बाढी व्यवस्थापनका लागि पाँच/छवटा जलाशय, हरियाली र पार्कसहितको सडकको विस्तारका काम सकिएपछि गुरुयोजना सम्पन्न हुनेछ । फोहोरमैला व्यवस्थापन, दुईवटा खोलाको व्यवस्थापन र केही भवन निर्माणको काम बाँकी छ । भवन निर्माणमा निजी क्षेत्रले चासो देखाएका छन् । अन्यत्रबाट स्रोत जुटेन भने नेपाल सरकारबाट सहयोग गर्ने प्रतिबद्धता पाएको सदस्य सचिव सानुराजा शाक्यले बताउनुभयो ।गुरुयोजनाको कामका अतिरिक्त लुम्बिनी र आसपासका बौद्धस्थल समेटेर ‘ग्रेटर लुम्बिनी’को अवधारणा पनि अगाडि बढाइएको छ ।
बलिउडका क्रिकेट क्रेज चलचित्र
बलिउडमा सन् १९५९ देखि क्रिकेटको कथामा आधारित २९ वटा चलचित्र बनेका छन् । तीमध्ये हालै प्रदर्शनमा आएको शाहिद कपुुर अभिनित चलचित्र ‘जर्सी’ हो । क्रिकेटमा आधारित रहेर बनेका यी २९ चलचित्रमध्ये तीन सुपरहिट (लगान, जन्नत र धोनी), तीन हिट (काई पो चे, सचिन, फेरारी की सवारी) र १९ फ्लप रहेका छन् भने चारवटा चलचित्रको अवस्था अझै सार्वजनिक गरिएको छैन ।
विद्युत् खेर जान नदिन पहल
प्रसारण लाइनको अभावमा लमजुङमा निर्माण सम्पन्न भएका आयोजनाहरूको विद्युत् खेर जाने अवस्था आएपछि नेपाल विद्युत् प्राधिकरणले चासो देखाएको छ । प्रसारण लाइन अभावमा लमजुङमा निर्माण सम्पन्न भएका आयोजनाको विद्युत् जोड्न नसक्ने स्थिति आएको भन्ने गुनासो आएपछि प्राधिकरणको उच्च व्यवस्थापनले त्यस क्षेत्रको निरीक्षण भ्रमण गरेको हो । प्राधिकरणका कार्यकारी निर्देशक कुलमान घिसिङ नेतृत्वमा योजना अनुगमन तथा सूचना प्रविधि निर्देशनालयका उपकार्यकारी निर्देशक प्रदीपकुमार
