कांग्रेस जिल्ला सम्मेलन ११ गते हुने

मीना कंडेल 

कावासोती, मङ्सिर ३ गते । नेपाली कांग्रेस नवलपुरको प्रथम जिल्ला सम्मेलन मङ्सिर ११ गते देवचुलीमा हुने भएको छ । राज्य पुनर्संरचनापछि बनेको कांग्रेसको संशोधित विधानअनुसार पहिलो जिल्ला सम्मेलन हुन लागेको हो ।

जिल्ला सम्मेलनमा नवलपुरका आठ पालिकाको ९२ वडाका एक हजार नौ सय ७२ जना क्षेत्रीय प्रतिनिधिको सहभागिता रहने सो दलले जनाएको छ । कांग्रेसले दुई वर्षअघि १४ औँ महाधिवेशनका क्रममा नयाँ संरचनाअनुसार वडादेखि केन्द्रसम्मको नेतृत्व चयन गरेको थियो । 

१४ औँ महाधिवेशनपछि पहिलो जिल्ला सम्मेलन हुन लागेको कार्यवाहक सभापति चन्द्रबहादुर रानाले बताउनुभयो । जिल्ला सचिव होमराज रानाभाटका अनुसार जिल्ला सम्मेलनलाई सम्बोधन गर्न कांग्रेस सभापति शेरबहादुर देउवा, नेता शेखर कोइराला महामन्त्रीद्वय गगनकुमार थापा र विश्वप्रकाश शर्मा तथा पूर्व महामन्त्री एवं सङ्घीय सांसद शशाङ्क कोइराला सहितका नेताहरूले सम्बोधन गर्ने जनाइएको छ ।

जिल्ला सम्मेलनलाई भव्य रूपमा सम्पन्न गर्न जिल्लाका आठ वटै स्थानीय तहका क्षेत्रीय प्रतिनिधि, वडा सभापति, नगर सभापति एवम् पदाधिकारी, प्रदेश सभापति एवम् पदाधिकारी सदस्य, क्षेत्रीय सभापति एवम् पदाधिकारी सदस्य, महाधिवेशन प्रतिनिधि एवम् महासमिति, शुभेच्छुक संस्थाका प्रमुख साथै क्रियाशील सदस्यलाई अनुरोध गरेको छ ।