राधा लुइटेल
फिदिम, फागुन १७ गते । पाँचथरका आठमध्ये चारवटा गाउँपालिकाका विकट क्षेत्रमा पर्ने मतदान केन्द्रमा खटाइएका कर्मचारी निर्वाचन सामग्री बुझेर कार्यस्थलतर्फ प्रस्थान गरेका छन् । जिल्लाको मिक्लाजुङ, तुम्बेवा, याङवरक र फालेलुङका विकट बस्तीमा खटिएका कर्मचारी आइतबार त्यसतर्फ प्रस्थान गरेका हुन् ।
अन्य चारवटा स्थानीय तहमा रहेका मतदान केन्द्रमा भने सोमबार कर्मचारी प्रस्थान गर्ने तयारी भइरहेको मुख्य निर्वाचन अधिकृतको कार्यालयले जनाएको छ । जिल्लाको याङवरक गाउँपालिका–२ तिम्बुपोखरी, मिक्लाजुङ–६ तोक्लेसँगै तुम्बेवा र फालेलुङका अधिकांश मतदान केन्द्र विकट क्षेत्रमा पर्छन् । यी केन्द्रमा सोमबार बिहानै कर्मचारी पुगिसक्ने बताइएको छ ।
यसैगरी फाल्गुनन्द, कुम्मायक, हिलिहाङ र फालेलुङका केही मतदान केन्द्रमा खटिएका कर्मचारीलाई भने सोमबार बिहानैदेखि सामग्री दिएर खटाउने कार्यक्रम तय भएको मुख्य निर्वाचन अधिकृत कुमार मास्केले जानकारी दिनुभयो ।
जिल्लामा १०२ मतदान स्थल र १७९ मतदान केन्द्र छन् । जिल्लाभर एक लाख ४३ हजार ४०८ मतदाता छन् भने १५ दलका १५ जना उम्मेदवार चुनावी प्रतिस्पर्धामा हुनुहुन्छ ।
-original-thumb.jpg)