कपिल ज्ञवाली
सिद्धार्थनगर, चैत ४ गते । गिनिज बुक अफ वल्र्ड रेकर्डमा दर्ता गर्नेगरी बुद्ध जन्मस्थल लुम्बिनीमा पाँच हजारको सहभागितामा विराट चक्रविज्ञान कार्यक्रम हुने भएको छ ।
लुम्बिनीस्थित अन्तर्राष्ट्रिय ध्यानकक्षमा नेपालसहित विभिन्न १५ मुलुकका नागरिकको उपस्थितिमा ७ दिनसम्म विभिन्न ५ वटा उर्जा ध्यानसहितको प्रयोगात्मक कक्षा सञ्चालनको तयारी तिब्र पारिएको छ ।
जीव विज्ञान परिषदको आयोजनामा चैत १७ गतेदेखि २३ गतेसम्म हुने विराट चक्र विज्ञानको तयारी तीब्र पारिएको जीव विज्ञान परिषद लुम्बिनीका संयोजक केशव खनालले जानकारी दिनुभयो ।
विश्वमै पहिलो पटक ठुलो संख्यामा ध्यानको कार्यक्रम आयोजना गर्न लागिएको र कार्यक्रमलाई गिनिज बुक अफ वल्र्ड रेकर्डमा समेत दर्ता गरिने उहाँको भनाइ छ । यस प्रकारको कार्यक्रम यसअघि अस्ट्रेलियमा आयोजना हुँदा १४७१ जना उपस्थित भइ ३ दिनसम्म आयेजना भएको उल्लेख गर्दै उहाँले यो नै पहिलो र ठुलो कार्यक्रम हुने दाबी गर्नुभयो ।
भगवान गौतम बुद्धको ‘अप्प दिपो भव’ अर्थात तिमी आफ्नो प्रकाश आफै बन भन्ने स्व–जागरणको उपदेशलाई सार्थक बनाउन कार्यक्रम आयोजना गर्न लागिएको उहाँको भनाइ छ । व्यक्तिभित्र नैसर्गिक रुपमा रहेका स्वास्थ्य सुख, आत्मविश्वास, प्रेम, ज्ञान, संकल्प र आनन्दको अद्भुत क्षमता तथा सम्भावनालाई उजागर गरी सुखी, शान्त र समृद्ध राष्ट्रको आधार तयार पार्न यसले सहयोग गर्ने दाबी गर्नुभयो ।
जीवन बिज्ञानका मानव विकास विशेषज्ञ गुरु एलपी भानु शर्मा र रमेश नेपाललगायतले ध्यान गराउनुहुनेछ । सो कार्यक्रमबाट विश्व शान्तिका अग्रदूत भगवान गौतमबुद्धको जन्मस्थल र उहाँले दिएका ध्यानको शिक्षालाई सामूहिक रुपमा विश्वमाझ फैलााएर नेपाललाई एक उत्कृष्ट आध्यात्मिक पर्यटकीय गन्तव्यस्थल बनाउन सहयोग पुग्ने दाबी गरिएको छ ।
बुटवलमा आयोजित पत्रकार सम्मेलनमा बोल्दै परिषदका सूचना तथा सञ्चार विभाग परिषद अध्यक्ष दुर्गाबहादुर क्षेत्रीले कार्यक्रममा देशका विभिन्न सरकारी निकायका प्रतिनिधि तथा अनुयायीलाई निमन्त्रणा गरिएको बताउनुभयो ।
लुम्बिनीमा आयोजना गरिएको यस कार्यक्रमले यस क्षेत्रको पर्यटन बिकास तथा आर्थिक बिकासमा समेत टेवा पुग्ने आयोजकले बताएको छ । विराट चक्रविज्ञानमा सहभागी हुने व्यक्तिको आवासका लागि लुम्बिनी, भैरहवा तथा बुटवलसम्मका होटल तथा गेष्टहाउसहरुमा व्यवस्था मिलाइने बताइएको छ । कार्यक्रममा सहभागी हुन रेजिष्ट्रेशनका लागि प्रतिव्यक्ति १० हजार शुल्क तोकिएको छ ।
