हामी आँसु बहाइरहेछौँ
जो भूकम्पले पुरिएर गए
जो पहिरोले लछारिएर गए
हामीले विषादमा नरोएको भए
अनुभूतको आकाशबाट आँसु नबहेको भए
शुष्क पृथ्वी छट्पटाइरहन्थ्यो
आद्र्र आँसु स्वर्गबाट खसेको
सञ्जीवनी अमृत
दुधको धारा
मुलायम मख्खनको मालिस
संसारको कुन मानिस छ नरोएको ?
जन्मदै आँखामा आँसु लिएको नवजात शिशु होस्
वा अभिन्न सम्बन्ध जोडिएकाको मृत्यु होस्
दुःखमा होस् वा सुखमा होस्
मानवीय भावनाको मनोवेग आँसु ।
आँसु हाँसोको भत्करु
आँसु मरेको मनमा मलजल
आँसु प्रकृतिले दिएको उपहार
आँसु मुहान फुटेर निस्केको स्वर्गीय जल
आँसु छ र हामी छौँ
सम्पूर्ण करुणालाई आँखाबाट विरेचित गरेर
हामी रोऔँ, खुब रोऔँ
आँसु हाम्रो जीवन, हाम्रो शक्तिको ऊर्जा
हाम्रो नवीन गन्तव्यको नयाँ पाइला ।
