गोविन्द शर्मा
गोविन्द शर्मा
जाजरकोट, कात्तिक २१ गते । शुक्रवार राति जाजरकोट केन्द्रबिन्दु बनाएर गएको भूकम्पमा परि भेरी नगरपालिका वडा नम्बर ३ थाप्लेकी लालसरी बुढाथोकीको घर पूर्णरूपमा क्षतिग्रस्त भएको छ । दुई वर्षअघि पति र एक वर्षअघि छोरा गुमाएकी लालसरी तेस्रो वर्ष घर भत्केपछि थप पीडामा पर्नुभएको छ ।
सोमबार साँझ भत्केको घरभित्रका काम लाग्ने सामान निकाल्दै गर्दा लालसरीले भन्नुभयो,‘राती सुतेको अवस्थामा एक्कासि घर भत्कियो, आसपासका घर ढलेर धेरैले जीवन गुमाए ।’ भूकम्पको समयमा आफू र छोरा बुहारीभित्रै सुतेको भए पनि सुरक्षित भएको उहाँ बताउनुहुन्छ ।
उहाँको टोलमा मात्रै भूकम्पमा परी १३ जनाको निधन भएको छ । सुरक्षाकर्मी र स्थानीय युवाहरू भत्केका घरभित्रबाट काम लाग्ने सामग्री निकालिरहेका छन् । पीडित परिवारले हालसम्म पनि राहत नपाएको गुनासो गरेका छन् । भूकम्प गएको चार दिनसम्म पनि प्रभावितहरू टेन्ट लगाएर तथा आफन्तको घरमा आश्रय लिएर बसिरहेका छन् ।
स्थानीय प्रतिमा शाहको घरमा भाडामा बस्ने स्थानीय गोल्डेन बोडिङ स्कुलका शिक्षक शोभा शाहको निधन भयो । उहाँका पति मोहन विष्टको भेरी अस्पतालमा उपचार भइरहेको छ । घरधनी प्रतिमा शाह ३ तल्ले घर भत्किएपछि आफन्तको घरमा रात बिताउने गरेको बताउनुहुन्छ ।
शाह भन्नुहुन्छ, ‘दसैँ मनाउन नेपालगन्ज भएकाले हाम्रो परिवार सुरक्षित छ, भाडामा बस्नेहरू र छिमेकीको दुःखद घटना सुन्नुपर्य ाे ।’ विद्यालयको छात्रावाससमेत पूर्णरूपमा क्षतिग्रस्त भएको छ । दसैँ बिदा भएकाले छात्रावासका विद्यार्थी नभएको शाहले बताउनुभयो । प्रभावितहरूले राहतसँगै खाना पकाउने ग्याँस र भाँडाकुँडाको समेत व्यवस्था हुनुपर्ने माग गरेका छन् । स्थानीय प्रेम अधिकारीले भन्नुभयो, ‘अहिलेसम्म राहत केही पाएका छैनौँ, राहत पाएपछि पकाउने सामग्री पनि आवश्यक छ । ’
