गोकर्ण दयाल
बैतडी, असोज १६ गते । बझाङ केन्द्रबिन्दु भएर गएको ६.३ रेक्टर स्केलको भूकम्पले बझाङ सहित बैतडीको सिगास गाउँपालिका, पुर्चौडी नगरपालिका, डिलासैनी गाउँपालिका र पाटन नगरपालिकामा दर्जनौँ घर र विद्यालयका भवनमा क्षति पुगेको छ । बैतडीको डिलासैनीमा एक बालिका घाइते भएकी छिन् ।
बझाङ केन्द्रबिन्दु भएर गएको भूकम्पले बैतडीको डिलासैनी गाउँपालिका–२, स्थित लटिनाथ आधारभूत विद्यालयमाथिबाट ढुङ्गा खस्दा १० वर्षीय छात्रा निरा भण्डारीको खुट्टामा गम्भीर चोट लागेको छ । भूकम्पले घर भत्किँदा बैतडीको सिगास गाउँपालिका–३,घकुराडी बस्ने रघुवीर साउदको घरमा क्षति पुगेको छ । साउद रोजगारीका लागि भारतमा छन् । घर भत्किएर आमा र दुई बालकको बिचल्ली भएको छ । भूकम्पले सिगास गास गाउँपालिकाको लेकलुपण माविको भवनमा क्षति पुगेको प्रधानाध्यापक हर्कबहादुर धामीले जानकारी दिनुभयो ।
त्यसैगरी, भूकम्पका कारण सडकमा धुले पहिरो खसेर बैतडी–बझाङ सडक अवरुद्ध भएको छ । भूकम्पको धक्काले जयपृथ्वीबहादुर नगरपालिका–७, कचली खोलामा माथिबाट धुलेपहिरो खसेर बैतडी–बझाङ जोड्ने सडक अवरुद्ध भएको बझाङका प्रमुख जिल्ला अधिकारी नारायण पाण्डेयले जानकारी दिनुभयो । पहाडबाट निरन्तर ढुङ्गा खसिरहेकाले सडक खुलाउन केही समय लाग्ने उहाँले बताउनुभयो ।
भूकम्पको ठुलै धक्का महसुस गरिएको जानकारी दिनुहुँदै प्रजिअ पाण्डेयले मानवीय क्षति भएको कुनै खबर प्राप्त नभए पनि स्थानीयका घर चर्केको बताउनुभयो । क्षतिका बारेमा प्रहरीमार्फत बुझ्ने काम भइरहेको उहाँले बताउनुभयो ।
तस्बिर: भूकम्पले बैतडीमा पु¥याएको क्षति ।
