हाङझाउ, असोज १५ गते । नेपाली राष्ट्रिय पुरुष क्रिकेट टोलीले पहिलो पटक भारतसँग टी-२० अन्तर्राष्ट्रिय क्रिकेट खेल्दैछ । एसियाड अन्तर्गत क्वार्टरफाइनल खेलमा नेपालले भारतसँग प्रतिस्पर्धा गर्न लागेको हो ।
क्वार्टरफाइनल खेलका लागि सोमबार गरिएको लक्की ड्र मा नेपालले बलियो भारत प्रतिद्वन्द्वी पाएको हो । नेपाल र भारतबिच मङ्गलबार बिहान प्रतिस्पर्धा हुनेछ ।
नेपालले एक महिना अघिमात्र एकदिवसीय एसिया कपमा भारतसँग प्रतिस्पर्धा गरेको थियो । नेपाल भारतसँग १० विकेटले पराजित भएको थियो । त्यतिवेला भारतसँग उत्कृष्ट ब्याटिङ गरेको नेपालको चर्चा विश्वभर चुलिएको थियो ।
एसियाड लगत्तै विश्वकप खेल्न लागेको भारतले यसपटक एसियाडमा दोस्रो रोजाइका खेलाडी चीन ल्याएको छ । त्यसैले भारतविरुद्ध नेपाली खेलाडीले राम्रो प्रदर्शन गर्न सकेमा क्रिकेटमा पनि नेपालको पदक जित्ने सम्भावना रहनेछ ।
एसियाड क्रिकेटको समूह चरणमा नेपालले पहिलो खेलमा मङ्गोलियामाथि दुई सय ७३ रनको विश्व कीर्तिमानी जित निकालेको थियो । दोस्रो खेलमा नेपालले माल्दिभ्सलाई एक सय ३८ रनले हराएको थियो ।
भारोत्तोलनमा कमजोर प्रदर्शन
एसियाड अन्तर्गत भारोत्तोलनमा नेपालले कमजोर प्रदर्शन जारी राखेको छ । समूह ‘बी’ को महिला ६४ केजीमा नेपालकी शारदा चौधरीले स्न्याचमा ७० तथा क्लिन एन्ड जर्कमा ८८ केजी गरी जम्मा १५८ केजी भार वहन गर्नुभयो ।
आफ्नो समूहमा शारदा पाँचौँ स्थानमा रहनुभयो । स्न्याचमा शारदाले पहिलो लिफ्टमा ७० केजी र तेस्रो लिफ्टमा ७४ केजी उचाल्ने प्रयास गरे पनि सफल हुनुभएन ।
शारदाले क्लिन एन्ड जर्कमा उठाएको ८८ केजी पहिलो लिफ्टमा हो । सारदाको क्लिन एन्ड जर्ककै दोस्रो र तेस्रो लिफ्टमा समान ९४–९४ केजी भार वहन गर्ने प्रयास सफल भएन । यससँगै भारतोलनमा नेपाली महिला खेलाडीको यात्रामा पूर्णविराम लागेको छ ।
यसअघि टीकामाया गुरुङले प्रतिस्पर्धा गर्नुभएको थियो । पुरुष खेलाडी विशालसिंह विष्ट, विकास भट्ट र सागर भण्डारीले चुनौती प्रस्तुत गर्न बाँकी छ ।
महिला भलिबलमा दक्षिण कोरियासँग पराजित
महिला भलिबलमा नेपाल दक्षिण कोरियासँग ३–० को सोझो सेटमा पराजित भएको छ । हाङझाउ नर्मल युनिभर्सिटी कान्चिन जिम्न्याजिममा एक घण्टा १२ मिनेट चलेको खेलमा दक्षिण कोरियाले नेपाललाई २५–२१, २५–१४, २५–११ ले हरायो ।
समूह ‘सी’ को पहिलो खेलमा नेपाल भियतनामसँग २५–४, २५–१६, २५–१३ को सीधा सेटमा हारेको थियो । यस हारसँगै नेपाल प्रतियोगिताबाट बाहिरिएको छ ।
नेपालले क्लासिफिकेसन म्याच भने खेल्न बाँकी छ । एसियाडको महिला भलिबलमा नेपालले पहिलो पटक खेलेको हो ।
