काठमाडौँ, असार २१ गते । अभिनेतृ रेखा थापाले नयाँ चलचित्रको नाम सार्वजनिक गर्नुभएको छ । चलचित्रको नाम ‘उपहार’ राखिएको छ । रेखा फिल्मस्ले निर्माण गर्न लागेको चलचित्र सामाजिक कथामा बन्ने छ । फिल्मको कथा सुलक्षण भारतीले लेख्नुभएको छ । ज्ञानेन्द्र देउजाको निर्देशन रहने चलचित्रमा रेखासँगै पूजा शर्माको मुख्य भूमिका रहने छ । साउनको दोस्रो साताबाट छायाङ्कन सुरु हुने चलचित्र यसै वर्ष प्रदर्शन गरिने योजना रहेको छ ।
चलचित्रको गीत पनि रेकर्ड गरिएको छ । बाबुल गिरीको सङ्गीत र शङ्कर अधिकारी घायलको शब्द रहेको गीतमा एलिना चौहानले स्वर दिनुभएको छ । गायनमा एलिनालाई बाबुलको साथ रहेको छ । चलचित्रमा चार वटा गीत रहने छ । अन्य तीन वटा गीतमा अर्जुन पोखरेलले सङ्गीत भर्नुभएको छ । साउनको दोस्रो साताबाट ‘उपहार’ को छायाङ्कन सुरु गर्ने रेखा फिल्मस्को तयारी छ ।
