काठमाडौं, वैशाख ११ गते । नेपाल प्रहरी र लक्ष्मी बैङ्क लिमिटेडबीच छात्रवृत्ति अक्षयकोष स्थापनासम्बन्धी समझदारीपत्रमा हस्ताक्षर भएको छ । सोमबार नेपाल प्रहरी प्रधान कार्यालयमा आयोजित कार्यक्रममा नेपाल प्रहरी र लक्ष्मी बैङ्क लिमिटेडबीच ‘नेपाल प्रहरी र लक्ष्मी बैङ्क छात्रवृत्ति अक्षयकोष’ स्थापना, सञ्चालन तथा व्यवस्थापनमा सहकार्य गर्नेसम्बन्धी समझदारीपत्रमा हस्ताक्षर भएको हो ।
उक्त समझदारीपत्रमा नेपाल प्रहरीका तर्फबाट प्रहरी नायब महानिरीक्षक केदार ढकाल र लक्ष्मी बैङ्कका तर्फबाट बैङ्कका प्रमुख रिटेल फाइनान्स सर्भिस दीपेश अमात्यले हस्ताक्षर गर्नुभएको छ । सो अवसरमा प्रहरी महानिरीक्षक वसन्त बहादुर कुँवर र लक्ष्मी बैङ्कका प्रमुख कार्यकारी अधिकृत अजय विक्रम शाहले समझदारीपत्र आदान प्रदानसमेत गर्नुभयो ।
कार्यक्रमलाई सम्बोधन गर्नुहुँदै प्रहरी महानिरीक्षक कुँवरले सम्झौताका लागि लक्ष्मी बैङ्कलाई धन्यवाद दिनुहुँदै यस सम्झौताले प्रहरी कर्मचारीहरूको मनोबल उच्च गर्ने, कार्यसम्पादनमा सकारात्मक सुधार ल्याउनुका साथै प्रहरी प्रवाह गर्ने सेवामा गुणस्तर अभिवृद्धि हुने विश्वास व्यक्त गर्नुभयो । आगामी दिनमासमेत नेपाल प्रहरी र लक्ष्मी बैंकबीच आपसी सहयोग आदान प्रदान हुने अपेक्षा उहाँले व्यक्त गर्नुभयो ।
यसैगरी, लक्ष्मी बैङ्कका प्रमुख कार्यकारी अधिकृत शाहले नेपाल प्रहरीले देश तथा समाजको शान्ति सुरक्षामा गरेको योगदानको प्रशंसा गर्नुहुँदै बैङ्कको सामाजिक उत्तरदायित्व अन्तर्गत देशका विभिन्न क्षेत्रमा समेत सहयोग गर्दै आएको बताउनुभयो । यस सम्झौताले प्रहरीका सन्ततीहरुलाई गुणस्तरीय शिक्षा हासिल गर्न सहयोग हुने अपेक्षा व्यक्त गर्नुहुँदै उहाँले आगामी दिनमा नेपाल प्रहरीसँग आवश्यक सहकार्य र समन्वय गर्दै जाने बताउनुभयो ।
सम्झौता अनुसार नेपाल प्रहरी प्रधान कार्यालय, कल्याण महाशाखाले तोकिएको नेपाल पुलिस स्कुलहरूमा अध्ययन गर्ने बहालवाला, पूर्व एवम् अवकाश प्राप्त, अमर शहीद एवम् अशक्त जुनियर प्रहरी अधिकृत दर्जाका प्रहरी कर्मचारीका सन्ततीहरूमध्ये उत्कृष्ट अङ्क प्राप्त गर्ने कम्तीमा दुई जना जेहेन्दार विद्यार्थीलाई वार्षिक शुल्क, परीक्षा शुल्क, स्टेशनरी र आवासीय सुविधा भएको स्कुलमा आवास र खाना खर्च तथा आवासीय सुविधा नभएको स्कुलमा गाडी भाडासमेत निरन्तर उपलब्ध हुनेछ ।
त्यस्तै, छात्रवृत्ति प्रदान गर्नका लागि लक्ष्मी बैङ्कले प्रहरी कल्याण कोषको नाममा ‘नेपाल प्रहरी(लक्ष्मी बैङ्क छात्रवृत्ति अक्षयकोष’ को स्थापना बापत एकमुष्ट नभई प्रत्येक वर्ष पाँच लाख रुपियाँका दरले कोषमा जम्मा २५ लाख रुपियाँ उपलब्ध गराउनेछ र उक्त खाता सञ्चालन तथा व्यवस्थापन प्रहरी कल्याण कोषले गर्नेछ ।
शैक्षिक सत्र २०८० वैशाखदेखि लागू हुने यो सम्झौता अनुसार नेपाल पुलिस स्कुलका कक्षा ४ देखि १२ सम्म अध्ययनरत विद्यार्थीहरूलाई उपलब्ध हुने र नेपाल पुलिस स्कुलहरूले विद्यार्थीहरूको समयानुकूल शुल्क परिमार्जन भई वृद्धि भएको अवस्थामा छात्रवृत्ति अक्षयकोषबाट प्राप्त हुने ब्याज आम्दानी रकमबाट अपुग भएमा आपसी समन्वय र सहमतिमा समस्या समाधान गरिनेसमेत समझदारीपत्रमा उल्लेख गरिएको छ ।
उक्त कार्यक्रममा प्रहरी अतिरिक्त महानिरीक्षकहरू, प्रहरी नायब महानिरीक्षकहरू एवम् वरिष्ठ प्रहरी अधिकृतहरू लगायत लक्ष्मी बैङ्क लिमिटेडका प्रतिनिधिहरूको उपस्थिति रहेको थियो ।
