काठमाडौं, चैत ६ गते । उपाधि दौडमा रहेको आर्सनलले इङ्लिस प्रिमियर लिग फुटबलमा सानदार जित निकालेको छ । घरेलु मैदानमा आइतबार राति भएको खेलमा आर्सनलले क्रिस्टल प्यालेसलाई ४-१ गोलले हरायो ।
आर्सनलको फराकिलो जितमा बुकायो साकाले दुई गोल गर्नुभयो । गाब्रियल मार्टिनेली र ग्रानिट झाँकाले एक एक गोल गर्नुभयो । क्रिस्टलका जेफरे स्कलपले सान्त्वना गोल फर्काउनुभयो ।
मार्टिनेलीले २८औं मिनेटमा गोल गर्दै आर्सनलको उत्साह जगाउनुभयो । ४३औं मिनेटमा बुकायो साकाले गोल गर्दै टोलीको अग्रता दोब्बर बनाउनुभयो ।
झाँकाले ५५औं मिनेटमा गोल गर्दै आर्सनललाई थप बलियो बनाउनुभयो । त्यसपछि ६३औं मिनेटमा जेफरेले गोल गर्दै क्रिस्टललाई खेलमा फर्काउने प्रयास गर्नुभयो ।
बुकायो साकाले ७४औं मिनेटमा ब्यक्तिगत दोस्रो गोल गर्दै आर्सनललाई सानदार जित दिलाउनुभयो । यस जितसँगै आर्सनलले शीर्षस्थानमा आठ अङ्कको अग्रता बनाएको छ ।
२८ खेल सकेको आर्सनलको ६९ अङ्क छ । एक खेल कम खेलेको म्यानचेस्टर सिटी ६१ अङ्कसहित दोस्रो स्थानमा छ । पराजित क्रिस्टल २७ अङ्कसहित १२औं स्थानमा छ । एजेन्सी
