नेप्से परिसूचकमा पहिरो जाने क्रम रोकिएन

काठमाडौं, असोज २५ गते । धितोपत्र बजारमा शेयर कारोबारमापक नेप्से परिसूचक दोहोरो अङ्कले ओरालो लागेको छ । नेपाल स्टक एक्सचेन्जका अनुसार नेप्से १६.०६ अङ्कले ओरालो लागेर एक हजार आठ सय ५५ दशमलव १६ मा सीमित भएको छ । ठूला कम्पनीको शेयर कारोबार मापन गर्ने सेन्सेटिभ परिसूचक तीन दशमलव २१ अङ्कले ओरालो लागेर तीन सय ६३ दशमलव ६३ मा सीमित भएको छ ।

कूल दुई सय २९ कम्पनीको १७ लाख ६७ हजार ६ सय ९२ कित्ता शेयर रु ५५ करोड २७ लाख १२ हजार आठ सय ८५ मा कारोबार भएको छ । यसबाट के बुझ्न सकिन्छ भने कारोबार रकम र नेप्से दुवैमा गिरावट आएको छ । कारोबार भएका १३ उपसमूहमध्ये तीन उपसमूहको शेयर मूल्यमा झिनो सुधार देखिएको छ भने १० उपसमूहको शेयर मूल्यमा गिरावट भएको छ । व्यापार, होटल तथा पर्यटन र सामूहिक लगानी कोषमा झिनो सुधार हुँदा अरू उपसमूहको शेयर मूल्यमा गिरावट देखिएको हो ।

आजको कारोबारपछि बजार पुँजीकरण रु २६ खर्ब ६६ अर्ब ४३ करोड ५१ लाख २९ हजार एक सय ५९ बराबर कायम भएको छ । कारोबारका आधारमा नविल बैङ्क शीर्ष स्थानमा छ । सो बैङ्कको रु तीन करोड १० लाख नौ हजार चार सय ४९ बराबरको कारोबार भयो । यस्तै, नेपाल लाइफ इन्स्योरेन्स रु दुई करोड ४३ लाख ६७ हजार सात सय ८९, हिमालयन पावर पार्टनर रु दुई करोड १८ लाख ९९ हजार पाँच सय १३ , रिडी पावर कम्पनी रु दुई करोड सात लाख तीन हजार आठ सय ७२ र नेपाल दूरसञ्चार कम्पनी रु एक करोड ९२ लाख ७४ हजार सात सय ३५ बराबरको कारोबार भई शीर्ष पाँचभित्र पर्न सफल भएका छन् ।

नेप्सेका अनुसार समिट लघुवित्तको शेयर मूल्यमा १० प्रतिशतको वृद्धि भई सकारात्मक सर्किट लाग्यो । अभियान लघुवित्त नौ दशमलव ९८, रुरु जलविद्युत् परियोजना सात दशमलव ८४ र श्वेत गङ्गा हाइड्रोपावरका लगानीकर्ताले चार दशमलव शून्य चार प्रतिशतले कमाएका छन् । यस्तै, विन्दवासिनी हाइड्रोपावर सात दशमलव १८, सिङगटी हाइड्रोपावर चार दशमलव २६, नेरुडे लघुवित्त तीन दशमलव ८३, सर्पोट माइक्रोफाइनान्स तीन दशमलव ७८ र एभरेष्ट बैङ्कका लगानीकर्ताले तीन दशमलव ७८ प्रतिशतले गुमाएका छन् ।