दुबई, वैशाख २५ गते । संयुक्त राज्य अमेरिकाले हर्मुज जलडमरूमध्य पुनः खुला गर्ने प्रयासका क्रममा इरानी शक्तिमाथि कारबाही गरेको जनाएको छ । यस घटनाले क्षेत्रीय तनावलाई थप बढाएको छ भने संयुक्त अरब इमिरेट्स (युएई) पनि आक्रमणको चपेटामा परेको बताइएको छ ।
अमेरिकी सेनाका अनुसार सोमबार गरिएको कारबाहीमा इरानी पक्षका छ वटा साना नौकालाई निशाना बनाइएको थियो, जसले नागरिक जहाजलाई लक्षित गरेको आरोप लगाइएको छ । अमेरिकी सैन्य स्रोतले दुई अमेरिकी झण्डा बोकेका व्यापारी जहाज सुरक्षितरूपमा जलडमरूमध्य पार गर्न सफल भएको बताएका छन् ।
यसैबिच, यूएईको रक्षा मन्त्रालयले आफ्नो हवाई प्रतिरक्षा प्रणालीले १५ मिसाइल र चार ड्रोन रोक्न सफल भएको जनाएको छ । पूर्वी फुजैराह क्षेत्रमा एक ड्रोन आक्रमणका कारण तेल सुविधामा आगलागी भएको र तीन जना भारतीय नागरिक घाइते भएको बताइएको छ । ब्रिटिश सैन्य निकायले पनि यूएई नजिक दुई कार्गो जहाजमा आगलागी भएको जानकारी दिएको छ ।
इरानले भने घटनाबारे प्रत्यक्ष पुष्टि वा अस्वीकार नगरी कूटनीतिक प्रतिक्रिया दिएको छ । इरानका विदेशमन्त्री अब्बास अराघचीले अमेरिका र युएईलाई ‘नयाँ द्वन्द्वमा नपर्न’ चेतावनी दिनुभएको छ । इरानी राज्य सञ्चारमाध्यमले भने युएईलाई लक्षित गर्ने कुनै योजना नरहेको दाबी गरेको छ । इजराइल-अमेरिका-इरानबिचको तनावबिच हर्मुज जलडमरूमध्य विश्व ऊर्जा आपूर्तिका लागि अत्यन्त महत्त्वपूर्ण मार्ग मानिन्छ ।
पछिल्लो घटनाले युद्धविराम कमजोर हुँदै गएको सङ्केत दिएको अन्तर्राष्ट्रिय विश्लेषकले बताएका छन् । अमेरिकी अधिकारीहरूले जलडमरूमध्यमार्फत व्यापारिक मार्ग सुरक्षित गर्न आफ्नो प्रयास जारी रहने बताएका छन् भने क्षेत्रीय देशलाई थप तनाव नबढाउन आग्रह गरिएको छ । यस घटनाले मध्यपूर्वको सुरक्षा अवस्था पुनः संवेदनशील बनेको र विश्व बजारमा ऊर्जा आपूर्तिमा असर पर्न सक्ने चिन्ता बढेको छ । रासस/एपी
