ङवाङ डोमा शेर्पा
ङवाङ डोमा शेर्पा
सोलुखुम्बु, साउन ७ गते । पयुल ग्यालखापला खाक्छे क्यानी काङग्यूकी छ्योगला ज्युयी वाउ मिरिगकी थोकला ङोशी ज्याङ वतु श्यार्वा तिवा याम्बा चिछोगकी मिमाङ्ग तिवा सिसिन च्याई गोमाला वाई । नेपाल सिक्यालुङ मे श्यार्वा ताङ पयुल मुलाराङ ज्याङन्ये ङोशी ज्याकु दाशा याङना ग्याल्खाप यिन् । जम्बुलिङ्गला राङ नेपाल सिक्यासिमा श्यार्वी लुङवा, काङग्रीकी लुङवा, साङ्गेकी कु ठुङगु लुङवा सिने ङो स्येकिवी । नेपालकी मिङ ती श्यार्वा ताङ काङ्ग्रीकी मुला थिनी वतु तप्की नेपाल चिछोग नाङला श्यार्वी स्योन्नो तिवी ल्येगेन ती छासेराङ खाक्छेम्बु ज्योक गोकी ।
नेपालकी मिङ जम्बुलिङला ङोशी ज्योकुला साङ श्यार्वी लेगेन छासेराङ खाक्छेम्बु वतु लोग्यून्ये हाक को थुप्की । ति क्यासिना ज्युकी ङिमाला नेपाल स्युङकी स्योनो तिवी कोर्ला फेन थोउ ठीम जोनी ल्यारिम तिवा खुन हुङ माथुपु तप्की स्योनो तिवा ल्हाक्पा सिसिन ल्हाक्पा छिग्याल लुङवा ढो गोन् वाई । नेपालला युल्कोर ताङ काजेकु लाका तेन्जीङ् नोर्गे शेर्वा तङ् सर एडमण्ड हिल्लरीकी सन् १९५३ ला च्योमोलोङ्मा ज्येक थर्सीमतीरङ् गोछुउ यीन् ।
यम्बुलाका युल्कोर तङ् कङरीला गल्ने लुङ्बी मीन् जम्बुलीङ्ला क्योलु तीरङ् मेन्दला क्षीग्यल्की मीतीवा टिवाने, खोङ्तीवला दल्जा क्याने लुङ्बी पल्ज्योर यर्गे तोङ्गु लाका तेरीसीनङ् ल्हाक्पा शेर्वी रङ् क्यन् वेई । सीरुराङ यीन्सीन नेपाल सीरुतुरुङ् च्योमोलोङ्मा तङ् शेर्वी जोसलेसी तिराङ जाम्बुलिङला ङोशी वतु यिन् सिक्यसीन् गिवी । दी रीम्बला तन्दा सक्ला शेर्वा मीरा वाङीकी की जम्बुलीङ्ला लाका ल्यमु क्यनङ्ने गीनीज बुक अफ वालर्ड रेकर्डला मीन् ग्यक्थुम वेई । श्यार्वाला तेन्जिङ्ग नोर्गे श्यार्वा ताङ पासाङ्ग ल्हामु श्यार्वी च्योमोलोङमा खाङग्री थर्सिमा जम्बुलिङ्गकी मिमाङ्गकी ङो स्ये थुपु यिन् ।
गोमाला श्यार्वा तिवी नेपाल यार्गे जोपला ताङ नेपालकी पल्ज्योरकी यार्गे जोपकी कोर्ला खाक्छेम्बु लेगेन ज्याङ वाई ।
पयुल ग्यालखाप नाङला राङगी लुग्सो, रिग्स्युङ्ग, क्ष्यो, किताङ्ग नातङ्ग वतु श्यार्वा तन्दा पल्ज्योरकी थोकला ताङ युल्कोरकी थोकला गोमाला वसिनाङ्ग छ्याप्सीकी थोकला तन्दा सग गोमाला हुङ माथुप वाई । श्यार्वा तिवा छ्याप्सिकी थोकला ङ्युङ ङ्युङ तिराङ्ग गोमाला वसिनाङ्ग तन्दा सग याम्बा चिछोगकी मिमाङ्ग दोके क्यानी गोमाला हुङ माथुप वाई । ति तप्की श्यार्वा तिवा वाङक्षा वातु दाशा याङना सत्ताला ल्येप मथुप वाई । पयुलकी चठीमकी विन्दु वाङक्षा तिवा लानी श्यार्वा तिवा साङ गोमाला थेन थुप गोकी ।
ग्याल्खापकी ठीम जोप दाशाला ल्येप थुप गोकी । नेपाल लुङ्बा ग्यूर्व गल्ने संघीय लोकतान्त्रिक गणतन्त्र नेपाल गँंंंंंंंल्सिन्दु तेरीला थोक्यु वोतु तम्ङ्ये यिन् । दोजोई तिराङ मिन्दा क्यान ज्युकी ङिमाला शेर्वा तिवा खोङ तिवी क्ये युल क्युन ज्याङ ने याम्बु तङ छिग्याल डोगोउ छुङ वे । नेपालला यिगे लाउ तङ यिगे माँलाऊ ङिकारला लाका ङ्ये माथुप वाई ति तप्की शेर्वातिवा दा दाक्पी क्ये युलक्युन ज्याङने मि लुङबा डोप रिम्बाला शेर्वा तम्ङे छयो, रिक्ज्युङ तिवा तेरी टोक जेने डिनोक सिसिङ शेर्वी युलतिवा तेरी तोङबा गल् वाई ।
दिकी जोशा ल्येन्सी नेपाल यार्गे जोपला राङ कले गल वाई । दि डो मिजिउला ति श्यार्वा तिवासाङ नेपालकी ठीम जोप दाशाला गल्ने याङना लोप्ज्युङ क्यासिमा मि लुङवा मागाला क्यानी राङगी लुङवाला राङ देनी नेपाल यार्गे जोपला नासम ताङने गोमा कि गोकी । दुकराङ क्यानी नेपाल सिक्याउती मिरिग नाछोग यिन्दु ताङ मिरिगकी क्ष्यो, रिग्स्युङ तङ लुग्सो तिवा पयुलकी दुर्सी यिन्दु तप्की दिला सुङक्योप कि गोकी दि नेपाल स्युङकी तेरी ल्हा मुथुपु तप्की श्यार्वी स्योन्नो तिवी शेर्वा तिवीतम्ङे छयो, रिक्ज्युङ तिवा यर्गे तोङगु तङ सुङक्योप कितु राङ्गी क्ष्योग्ने हुर्तक कि गोकी ।
दुकराङ क्यानी पयुल ग्यालखाप राङ्सिन थुन्क्योङकी थोक्ने साङ गोमाला वसिनाङ नेपाल स्युङकी तन्दा सग दिला थोक माथुप वाई ति तप्की ज्युकी ङिमाला श्योन्नो तिवा लोप्ज्युङ क्यासीमा छिग्याल लुङबा मागाला क्यानी राङगी लुङवाला वतु राङ्सिन थुन्क्योङ तिवा चुक क्यानी थोक थुप्की चिछोग नाङला टोङगु कोतुरकी ल्यारिम तिवा गोढिग क्यानी गोमा कि थुप गोकी ।
दि कि थुप्सुङ सिसिन पयुलकी स्योनो तिवा छिग्याल लुङबाला लाका छल्ने ढो गोउ खाक्छे साङ म्यागी । श्यार्वी स्योन्नो तिवी तन्दा खाङ्ग्री ताङ युल्कोरकी थोकन्ये ज्याकु लेगेन दोके क्यानी याम्बा राङ्सिन थुन्क्योङ थोकला साङ लेगेन ज्योक थुप्सी नेपालकी पल्ज्योर यार्गे जो थुप्की ति क्यासुङ सिसिन नेपाल यार्गे ढोपला कले म्ये । गोमाला श्यार्वा तिवी नेपाल यार्गे जोपला ताङ नेपालकी पल्ज्योरकी यार्गे जोपकी कोर्ला खाक्छेम्बु लेगेन ज्याङ वाई । ति क्यासिनाङ ज्युकी ङिमाला श्यार्वा तिवा छिग्याल लुङवा ल्हाक्पा सिसिन ल्हाक्पा गल्ने श्यार्वा तिवी राङगी लुङवा जोपला गोमी दोके क्यानी लेगेन ज्योक माथुप वाई ।
