साहारा लिम्बू
फुङलिङ, फागुन १७ गते । प्रसिद्ध तीर्थस्थल पाथीभरा मन्दिरको दर्शनका लागि आउनुभएका एक जना वृद्ध बेपत्ता हुनुभएको छ । यही फागुन ८ गते पाथीभरा मन्दिर दर्शनका लागि आउनुभएका झापाको कमल गाउँपालिका–५ का टङकबहादुर खड्का बेपत्ता हुनुभएको हो ।
६५ वर्षीय खड्का पाथीभरा मन्दिर पुग्नभएको थियो, तर त्यहाँबाट नफर्किएको पारिवारिक स्रोतले जानकारी दिएको छ । उहाँको खोजी कार्य तीव्र बनाइएको जिल्ला प्रहरी कार्यालयका प्रहरी निरीक्षक एवम् सूचना अधिकारी जटाशङ्कर यादवले जानकारी दिनुभयो ।
पाथीभरा क्षेत्र विकास समितिका कर्मचारी, नेपाल प्रहरी र सशस्त्र प्रहरीको टोलीले दुई दिनसम्म खोजी गर्दा पनि नभेटिएको पाथीभराका कर्मचारी राजेन्द्र महतले जानकारी दिनुभयो । पाथीभरा क्षेत्रमा हिउँ भएकाले अहिले खोजी कार्यमा समस्या आएको छ ।
