गोरखापत्र अनलाइन
काठमाडौँ, फागुन १५ गते । सैनिक कमाण्ड तथा स्टाफ कलेजमा २०८२ वैशाख ४ गतेबाट सुरु भएको ३२ औँ कमाण्ड तथा स्टाफ तालिमको दीक्षान्त समारोह प्रधानसेनापति अशोकराज सिग्देलको प्रमुख आतिथ्यमा शुक्रबार सम्पन्न भएको छ।
समारोहलाई सम्बोधन गर्दै प्रधानसेनापति सिग्देलले तालिममा प्रथम हुने सेनानी दीपेन्द्रविक्रम केसीलाई सर्वोत्कृष्ट शिक्षार्थी पुरस्कार र भारतीय सेनाका मेजर अनमोल चौधरीलाई सर्वोत्कृष्ट अन्तर्राष्ट्रिय शिक्षार्थी अधिकृत पुरस्कार प्रदान गर्नुभयो।
सोही अवसरमा उहाँले कलेजको वार्षिक प्रकाशन 'शिवपुरी जर्नल' को २७ औँ संस्करण विमोचन गर्नुभएको कुरा उल्लेख गर्नुभयो।
कार्यक्रममा 'मास्टर्स इन स्ट्राटेजिक स्टडिज' (एमएसएस) तर्फ प्रथम भएका भारतीय सेनाका मेजर अनमोल चौधरीलाई त्रिभुवन विश्वविद्यालयका उपकुलपति प्राध्यापक डा. दीपक आचार्यले पुरस्कार प्रदान गर्नुभयो।
यस्तै,'कमाण्डान्ट पेपर' तर्फ प्रथम भएका सेनानी सञ्जय सिलवाल र सहसेनानी विनोदकुमार गुरागाईंलाई शिक्षाधिकृत उपरथी भुवन खत्रीले पुरस्कार प्रदान गर्नुभएको जानकारी गराइयो।
दीक्षान्त समारोहबारे चर्चा गर्नुहुँदै सैनिक जनसम्पर्क तथा सूचना निर्देशनालयले आजको समारोहमा नेपाली सेनाका ८१ जना, नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभागका एक/एक जना सहभागी रहेको बताउनुभयो। साथै मित्रराष्ट्र बंगलादेश, चीन, भारत, केन्या, माल्दिभ्स, नाइजेरिया र पाकिस्तानका गरी आठ विदेशीसहित जम्मा ९२ जना अधिकृतहरू दीक्षित भएको धारणा व्यक्त गर्नुभयो।
यससँगै हालसम्म नेपाली सेनाका १ हजार ३०८, नेपाल प्रहरीका १७, सशस्त्र प्रहरी बल नेपालका २९, राष्ट्रिय अनुसन्धान विभागका २०, रक्षा मन्त्रालयका १ र विभिन्न राष्ट्रका १३२ गरी जम्मा १ हजार ५०७ जना शिक्षार्थी अधिकृतहरू प्रशिक्षित भएको कुरा निर्देशनालयले स्पष्ट पारेको छ।
उक्त कार्यक्रममा रथीवृन्द, पूर्वशिक्षाधिकृतहरू, सुरक्षा निकायका ज्येष्ठ अधिकृत, रक्षा मन्त्रालयका सहसचिव, विभिन्न देशका सैनिक सहचारीहरू एवं शिक्षार्थीका परिवारजनको उपस्थिति रहेको कुरा समारोहमा उल्लेख गरियो।
