सिराज खान
नेपालगन्ज, माघ ४ गते । बाँके जिल्लाको पूर्वी क्षेत्रमा गत केही दिन यता पाटेबाघ र चितुवाको आतङ्क बढेको छ । जिल्लाको पूर्वमा पर्ने राप्तीसोनारी गाउँपालिका वडा नम्बर १ कुसुमस्थित बर्दापुर, लौकी तथा दाङको राजपुर गाउँपालिका–७ हाड्बास गाउँ क्षेत्रमा बाघ र चितुवाको आतङ्क बढेपछि स्थानीय आतङ्कित र भयभीत बनेका हुन् ।
केहीदिन अघि बाँकेको राप्ती सोनारी–१ सौरी निवासी ६१ वर्षीय मरिचमान भण्डारीको पाटेबाघको आक्रमणमा परेर मृत्यु भएको थियो । त्यसको केही दिनपछि बर्दिया राष्ट्रिय निकुञ्जअन्तर्गत पर्ने सुर्खेतको सीमावर्ती क्षेत्रमा एक जना र बाँके राष्ट्रिय निकुञ्जको सीमावर्ती क्षेत्र सल्यानको कालिमाटी गाउँपालिकामा २ जनाको पाटेबाघको आक्रमणबाट मृत्यु भएको थियो ।
ती घटनापछि राप्तीसोनारीका विभिन्न ठाउँमा बाघ र चितुवाको त्रास बढ्दै गएको स्थानीयले जनाएका छन् ।
राप्ती सोनारी–१ खोकरीका स्थानीय कृष्ण चौधरीका अनुसार शनिबार पनि बाँकेको सीमाक्षेत्र रहेको दाङको राजपुर गाउँपालिका–७ हाड्बास गाउँको उत्तरतर्फ रहेको राप्ती बगरको नर्सरीमा पाटेबाघ देखापरेको छ ।
पाटेबाघ लुकेको नर्सरी पूर्व–पश्चिम राजमार्गअन्तर्गत अमिलियादेखि राप्तीपारि क्षेत्र हो । नर्सरीमा पाटेबाघ लुकेको स्थानीय बासिन्दाले देखेको चौधरीले बताउनुभएको छ ।
सोही प्रकारले राप्ती सोनारी–१ बर्दापुरका स्थानीय बासिन्दा रुद्र ओलीका अनुसार पाटेबाघ गाउँ नजिकैको वन, जङ्गलमा निरन्तर देखा परिरहेको छ । दिनहुँजसो बाघ देखा पर्न थालेपछि स्थानीय बासिन्दाहरु भयभीत र आतङ्कित बनेको उहाँले बताउनुभयो । बाघ र चितुवाको सम्भावित खतराबाट बच्न स्थानीय बासिन्दाले झाडी, बुट्यान सफाइ गरेका छन् ।
जिल्लाको पूर्वी क्षेत्रमा वन्यजन्तुको आतङ्क बढेसँगै बाँके राष्ट्रिय निकुञ्जले निगरानी बढाएको जनाएको छ । निकुञ्जका प्रमुख एवम् वरिष्ठ संरक्षण अधिकृत वीरेन्द्रप्रसाद कँडेलले स्थानीय बासिन्दाबाट बाघ र चितुवा गाउँ नजिक आएको सूचना प्राप्त हुनासाथ त्यस क्षेत्रमा गस्ती र निगरानी बढाइएको बताउनुभयो ।
उहाँले भन्नुभयो, ‘‘हामीले बाघको आक्रमणबाट मरिचमान भण्डारीको मृत्यु भएको स्थानमा क्यामेरा राखेर निगरानी गरिरहेका छौं, यद्यपि अहिले बाघ उक्त स्थानमा देखिएको छैन, पूर्वी क्षेत्रमा बाघ र चितुवा बस्ती नजिक आइरहेको भन्ने जानकारी आएपछि हामीले त्यतातिर पनि सुरक्षा निगरानी केन्द्रित गरेका छौं ।’’
गाउँबस्ती नजिकै हिंस्रक वन्यजन्तुको बाक्लो उपस्थिति देखिएकाले निकुञ्ज कार्यालयले स्थानीय बासिन्दालाई उच्च सतर्कता अपनाउन विभिन्न माध्यमबाट सचेत गरिरहेको वरिष्ठ संरक्षण अधिकृत कँडेलले बताउनुभयो ।
