-copy.png)
सिराज खान
नेपालगन्ज, मङ्सिर २७ गते । स्वास्थ्य कार्यालय बाँकेले जिल्लाभित्र सञ्चालनमा रहेका सबै निजी तथा प्राइभेट स्वास्थ्य संस्थाहरूलाई दर्ता र नवीकरण गराउन आग्रह गरेको छ ।
कार्यालयले सूचना प्रकाशित गर्दै स्वास्थ्य सेवा सञ्चालन गर्दै आएका संस्थाहरूले ऐन तथा नियमावलीअनुसार आवश्यक प्रक्रिया पूरा गरेर दर्ता तथा नवीकरण गर्न आग्रह गरेको हो ।
स्वास्थ्य कार्यालय बाँकेका प्रमुख सुनिता पौडेलद्वारा हस्ताक्षरित सूचनामा प्रदेश स्वास्थ्य संस्था स्थापना, सञ्चालन, नवीकरण तथा स्तरोन्नति ऐन २०७६ तथा नियमावली (पाँचौँ संसोधन)२०८० बमोजिम जिल्ला भित्रका सबै पोलिक्लिनिक, स्वास्थ्य क्लिनिक, डेन्टल क्लिनिक तथा फिजियोथेरापी सेवा जस्ता स्वास्थ्य संस्थाको स्थापना, सञ्चालन, नवीकरण, स्तरोन्नति र नियमन गर्ने निकाय स्वास्थ्य कार्यालय नै हुने भएकाले सोही अनुसार सेवा प्रदान गर्ने सबै संस्थाले अनिवार्य रूपमा दर्ता र नवीकरण गर्नुपर्ने जनाइएको छ ।
सोही प्रकारले १५ शय्याभन्दा माथिका अस्पतालहरूलाई दर्ता तथा नवीकरणको सिफारिसका लागि आवश्यक मापदण्ड पूरा गरी स्वास्थ्य कार्यालयबाट नै सिफारिस लिनुपर्ने सो सूचनामा उल्लेख गरिएको छ ।
सङ्घ वा प्रदेश तहमा दर्ता गर्नुपर्ने अस्पतालहरूको प्रारम्भिक सिफारिस स्वास्थ्य कार्यालयबाट हुने भएकाले सो प्रक्रिया पूरा गर्न कार्यालयले आग्रह गरेको स्वास्थ्य कार्यालय बाँकेका जनस्वास्थ्य अधिकृत नरेश श्रेष्ठले बताउनुभयो ।
उहाँले तोकिएको समयसीमा भित्र दर्ता र नवीकरण नगराउने पोलिक्लिनिक, स्वास्थ्य क्लिनिक, डेन्टल क्लिनिक तथा फिजियोथेरापीलाई कारबाही गरेर कानुनको दायरामा ल्याइने बताउनुभयो ।
स्वास्थ्य कार्यालय बाँकेले जिल्लाभित्रका सबै सम्बन्धित स्वास्थ्य संस्थालाई आवश्यक कागजातसहित दर्ता, नवीकरण तथा सिफारिसका लागि कार्यालयमा निवेदन पेस गर्न अनुरोध गरेको छ ।
