काठमाडौँ, मङ्सिर १४ गते । राष्ट्रिय युवा सेवा कोषले २०८२ को अरनिको युवा कला पुरस्कार कलाकार सुरेम देसारलाई दिने निर्णय गरेको छ । वरिष्ठ कलाकार प्राज्ञ विजय थापाको संयोजकत्वमा गठित पुरस्कार छनोट समितिले सो निर्णय गरेको हो ।
कोषका सदस्यसचिव डा. विष्णुबहादुर भण्डारीले शुक्रबार विज्ञप्ति जारी गरी कलाको विकास र विस्तारमा निरन्तर योगदान दिएबापत कलाकार देसारलाई सो पुरस्कार प्रदान गरिएको जानकारी दिनुभएको छ ।
त्यसै गरी नारायणगोपाल युवा सङ्गीत पुरस्कार गायिका रिता केसीलाई प्रदान गर्ने निर्णय गरिएको छ । प्राडा दीपक जङ्गमको संयोजकत्वमा गठित पुरस्कार छनोट समितिले सो निर्णय गरेको हो ।
ललितपुर जिल्ला चापागाउँका सुरेम देसार दुई दशकभन्दा बढी समयदेखि नेपाली आधुनिक चित्रकला कर्ममा सक्रिय हुनुहुन्छ । कला विषयमा स्नातकोत्तर गरी कला शिक्षणका साथै ग्रामीण क्षेत्रमा पुगेर चित्रकलाको प्रवर्धन र शिक्षामा काम गर्दै आउनुभएको छ । नेपाली जनजीवन, प्राकृतिक सौन्दर्य, संस्कृति र सांस्कृतिक सम्पदाका विषयमा यथार्थवादी कला सिर्जना गर्ने कलाकार देसारले समसामयिक विषयवस्तुमा समेत चित्र बनाउँदै आउनुभएको छ । गहिरो अवलोकन शक्ति, प्रकृति प्रेम र मानवीय संवेदनालाई क्यानभासमा रूपान्तरण गर्ने कलाकार देसारका चित्रहरू केवल रङ–रेखाको समष्टि मात्र होइन, भाव, स्मृति र समयका कथा बोकेर आउने जीवन्त अनुभूति हुन् । उहाँले कला शिक्षकको भूमिकामा नयाँ पुस्तामा सौन्दर्य बोध, सिर्जनशील अनुशासन र कलात्मक सोच विकसित गराउँदै आउनुभएको छ । उहाँका चित्रहरूमा प्रकृतिको प्रकाश, मौसमी वातावरण, ग्रामीण जीवन र सांस्कृतिक सूक्ष्मता, स्वाभाविक र काव्यमय रूपमा प्रकट हुन्छन् । कलालाई जनजीवनसम्म पु¥याउनु पर्छ भन्ने दृढता राख्नुहुने देसारले देशका दुर्गम गाउँबस्ती, पैदलमार्ग, ग्रामीण विद्यालय र स्थानीय समुदायमा पुगेर उनले कलाको महìव, सिर्जनशील सोच र अभिव्यक्तिको शक्ति बुझाउने काम निरन्तर गर्दै आउनुभएको छ । उहाँ फोटोग्राफी तथा दृश्य–कथानक निर्माणमा पनि समान रूपमा सक्रिय हुनुहुन्छ । उहाँका चित्रकलाले अवलोकन, क्षमता र कथनशैलीलाई थप गहिरो बनाइदिन्छ ।
कलाकार, पत्रकार र साहित्यकार सम्मिलित ‘कुक’ (कुची र कलम) समूहमा आबद्ध रहेर कलाकार देसारले केही समययता देशका विभिन्न भूभागमा पुगेर प्रकृति र संस्कृतिलाई चित्रमा उतार्दै आउनुभएको छ ।
काठमाडौँको बाँसबारीस्थित रिपुमर्दिनीदेवी सैनिक महाविद्यालयमा कला गुरुका रूपमा समेत सक्रिय देसार भन्नुहुन्छ, “चित्रकला त मलाई जीवनमा सँगै हिँड्ने साथी जस्तै लाग्छ । चित्रकला भएन भने त म अधुरो हुन्छु होला । चित्रकलाले रचनात्मक भएर बाँच्न सिकाएको छ ।”
