नवराज नेपाली
बागलुङ (गलकोट), कात्तिक १६ गते । मध्यपहाडी लोकमार्गको बागलुङस्थित बिहुँखण्ड नौ वर्षसम्म कालोपत्रे नभएपछि स्थानीयले आन्दोलनको घोषणा गरेका छन् । बागलुङको काठेखोला गाउँपालिका –५ र ६ का स्थानीयले आज जिल्ला प्रशासन कार्यालय बागलुङका प्रमुख जिल्ला अधिकारी कुमानसिंह गुरुङलाई ध्यानाकर्षणपत्र बुझाएका छन् ।
काठेखोला गाउँपालिका –५ का वडा अध्यक्ष ज्ञामनाथ कँडेल र ६ का वडा अध्यक्ष वृहस्पती कँडेलको नेतृत्वमा जिल्ला प्रशासन आएको स्थानीयले मध्यपहाडी लोकमार्गले तत्कालै काम सुरु नगरे मंसिर १ गतेबाट लोकमार्गको बागलुङको बिहुँखण्ड बन्द गर्ने चेतावनी दिएका छन् ।
आर्थिक वर्ष २०७२–७३ सालमा दुई वर्षमा सक्नुपर्ने काम पाँच पटक म्याद थप्दा समेत निर्माण सम्पन्न नभएपछि गतवर्ष ठेक्का रद्द गरेर नयाँ ठेक्का लगाइएको थियो । नयाँ ठेकदारले समेत जम्मा १२ प्रतिशत मात्रै भौतिक प्रगति गरेपछि स्थानीयहरु सडक बन्दको चेतावनीसहित जिल्ला प्रशासन कार्यालयमा आएर चार बुँदे ध्यानाकर्षणपत्र बुझाएका थिए ।
धुलोका कारण सास्ती खेप्नु परेको, वर्षौदेखि सडक अलपत्र परेको र तत्काल कालोपत्रको काम नथाले आन्दोलनमा उत्रेको जनाएको छ । मंसिरसम्म जिल्ला प्रशासन कार्यालयसहित मध्यपहाडी लोकमार्ग र निर्माण व्यवसायीबिच बैठक बसेर काम थाल्न लगाउने प्रजिअ गुरुङले स्थानीयलाई आश्वासन दिनुभएको छ । मध्यपहाडी लोकमार्गको बागलुङ खण्डको सबै सडक कालोपत्र सकिँदा बिहुँखण्डको १२ किमी सडक अझै कालोपत्र भएको छैन ।
बिहुँ–घोडाबाँधे खण्डको १३ किलोमिटर सडक सात आठ वर्ष वित्दा समेत कालोपत्र सम्पन्न नभएपछि ठेक्का तोडेर २०८१ असार २१ गते दुई वर्षमा बाँकी पूर्वाधार र कालोपत्र सक्नेगरी तामाङ–रिजाल भगवती जेभीसँग सम्झौता गरिएको थियो ।
