लीलाधर वली
घोराही, भदौ ३० गते । दाङ जिल्ला अदालतले सोमबारदेखि सेवा दिन सुरु गरेको छ ।
जेनजी आन्दोलनका क्रममा तोडफोड र आगजनी भएको कार्यालयलाई मर्मत गर्दै सेवा दिन थालेको हो । जिल्ला अदालतले तारिक बुझ्ने, पक्राउ अनुमति जारी, मुद्दाको म्याद थपलगायतका सेवा सुरु गरेको दाङ जिल्ला अदालतका श्रेस्तेदार भुपाल भण्डारीले जानकारी दिनुभएको छ ।
उहाँका अनुसार नियमित रूपमा पूर्ण सेवा दिनका लागि कार्यालय मर्मतसँगै सर्वोच्च अदालतमा आगलागी भएर डाउन भएको सर्वर सञ्चालनमा आउनुपर्ने बताउनुभयो । कार्यालय पनि मर्मतका क्रममा रहेको र डाउन भएको सेवा समेत सञ्चालनमा नआएको अत्यावश्यक तारिक बुझ्ने, मुद्दाको म्यादथप, पक्राउ अनुमति जारी, मोबाइलको कल डिटेल लिनका लागि प्रहरीलाई आवश्यक पर्ने अनुमति लगायतका सेवा दिन सुरु गरिएको बताउनुभयो ।
तोडफोड र आगजनीबाट क्षति भएका संरचनाको मर्मत गर्दै कार्यालय सञ्चालन गरिएको भन्दै अदालतका श्रेष्तेदार भण्डारीले भन्नुभयो,‘‘पूर्णरूपमा सेवा दिन समय लाग्ने भए पनि कार्यालयमा तोडफोड भएका झ्याल,ढोका, टेबल,कुर्सी र दराजहरु मर्मत गर्दै आकस्मिक सेवाहरू दिन थालेका छौ । पूर्णरूपमा सेवा दसैँ तिहारपछि नै हुने छ ।’’ उहाँका अनुसार अदालत तोडफोड र आगजनीका क्रममा दुई करोड बराबरको क्षति भएको छ ।
श्रेष्तेदार भण्डारीका अनुसार जेनजी आन्दोलनका क्रममा भदौ २४ गते अदालतमा भएका ३७ वटा कम्प्युटर तोडफोडसँगै आगजनी र नगद चार लाख रुपियाँ चोरी भएको थियो । त्यसैगरी आगलागीका कारण अदालतमा रहेका दुई वटा मोटरसाइकलमा समेत क्षति पुगेको थियो ।
