अविनाश चौधरी
धनगढी, भदौ १४ गते । कैलाली प्रहरीले लागुऔषधसहित पाँच जनालाई पक्राउ गरेको छ । प्रहरीले जिल्लाको विभिन्न स्थानबाट चार ग्राम ९० मिलिग्राम खैरो हेरोइन र पाँच केजी ६९० ग्राम चरेशसहित उनीहरूलाई पक्राउ गरेको हो ।
जिल्ला प्रहरी कार्यालयका अनुसार धनगढी उपमहानगरपालिका–२, निगर ब्यारेलबाट डोटीको शिखर नगरपालिका–८ घर भई गोदावरी नगरपालिका–१ बस्ने ३५ वर्षीय वीरबहादुर रावललाई दुई ग्राम ७६० मिलिग्राम खैरो हेरोइनसहित पक्राउ गरिएको छ ।
त्यस्तै, कैलालीको चुरे गाउँपालिका–३ का ३२ वर्षीय मोहन मल्ललाई ५९० मिलिग्राम खैरो हेरोइनसहित पक्राउ गरिएको छ । उनले मोबाइलको खोलभित्र लागुऔषध लुकाएको अवस्थाबाट बरामद गरिएको जिल्ला प्रहरी कार्यालयका सह प्रवक्ता प्रहरी निरीक्षक लोकराज जोशीले जानकारी दिनुभयो ।
यसैगरी, बझाङकोे बुङ्गल नगरपालिका घर भइ हाल धनगढी उपमहानरपालिका–२ मा जयराम होटल एन्ड लज रेस्टुरेन्ट चलाउँदै आएका ३२ वर्षीय राम बोहरालाई पाँच केजी ६९० मिलिग्रामसहित पक्राउ गरिएको छ । होटलमा खानतलासी गर्दा चरेश भेटिएपछि सञ्चालक बोहरालाई पक्राउ गरिएको हो ।
धनगढी उपमहानगरपालिका–१२ऽ जुगेडाबाट सोही ठाउँका २३ वर्षीय विजय विक र धनगढी–७ का प्रदीप रानालाई ७४० ग्राम खैरो हेरोइनसहित पक्राउ गरिएको छ । पक्राउ परेका पाँचै जनालाई आवश्यक कारबाहीका लागि हिरासतमा राखेर थप अनुसन्धान भइरहेको प्रहरी निरीक्षक जोशीले जानकारी दिनुभयो ।
