यो यात्रा कठिन होस्
तर त्यसको नतिजा मिठो होस्
दुःखून् खुट्टाहरू, फुटून् पैतालाहरू
तर चुम्न सकियोस् गन्तव्य ।
भिडहरूभन्दा टाढा
कोलाहलभन्दा पर
सुनसान प्रकृतिको काखमा
रमाउँदै, चुनौतीहरू पार गर्न सकियोस्
पर्वतहरूसँग हातेमालो गर्दै
पहरा र छहरासँग पौँठेजोरी खेल्दै
भिर, पाखा, झाडी, बुट्यानहरूसँग अङ्कमाल गर्दै
एक अद्भुत र अविस्मरणीय यात्रा बनोस्
चाँदी जस्ता हिमशृङ्खला
उडिरहने बादलुका ढिक्काहरू
बहिरहने हावाका झोक्काहरू
हेरिरहूँ जस्ता फराकिला पाटनहरूसँगै
छिचोल्दै पर्वतीय पाखाहरू
सुम्सुम्याउँदै ब्रह्मकमलका थुङ्गाहरू
कुल्चिँदै च्वाँफूलका बुटीहरू
यो यात्रा अविस्मरणीय होस्
देवगण र महर्षिहरूको भूमिमा
पाइलाहरूले कुनै विराम नगरून्
दृष्टिहरू भ्रममा नपरून्
सपनाहरूले चुली, चुचुरासम्म टेकून्
