मलेसियामा कार्यरत दिपकको असामयिक निधन, परिवारमा बज्रपात

विनय कर्ण
कल्याणपुर (सप्तरी), भदौ १४ गते । घर परिवारको सुन्दर भविष्य बनाउने सपना बोकेर १३ वर्षअघि वैदेशिक रोजगारीका लागि मलेसिया पुगेका रुपनी गाउँपालिका–२ हरिरावाटोलका दिपककुमार राम सदाका लागि बिदा भएका छन् ।

विदेशमा श्रम बेचेर परिवारलाई खुशी दिने सपना बोकेका ३२ वर्षीय दिपक श्रीमती र दुई सन्तानलाई असहाय अवस्थामा छोडेर संसारबाट बिदा भएका हुन् ।

सोमबार बिहान आएको श्रीमानको मृत्युको खबरले २८ वर्षीया श्रीमती रेणुकुमारी रामको जीवनमा बज्रपात नै भयो । गत शुक्रबार बिहान ११ बजे फोनमा दिपकसँग सामान्य कुराकानी गर्नुभएको रेणुलाई श्रीमानको मृत्यु भएको बारे अझै विश्वास लागेको छैन ।

“शुक्रबार बिहानको ११ बजे फोनमा कुरा भएको थियो, त्यस्तो कुनै समस्या थिएन । स्वास्थ्य पनि ठिकै जस्तो लागिरहेको थियो । शनिबार उहाँको साथीले अस्पताल उपचार भइरहेको जानकारी दिनुभयो, तर सोमबार अचानक मृत्युको खबर आयो ।’’ रेणुले भन्नुभयो, “हाम्रो जीवनमा बज्रपात नै भयो ।’’

तीन जनाको परिवारमा दिपक मात्र कमाउने व्यक्ति थिए । उहाँको कमाइले छोराछोरीको लालनपालन, पढाइ, घरखर्च सबै चल्थ्यो । अब के गर्ने भन्ने चिन्ताले उहाँलाई पिरोलेको छ ।

उहाँको सात वर्षीय छोरा विप्लव अझै बुझ्ने भइसकेका छैनन् । तीन वर्ष अघि मलेसिया जाँदा दुई वर्षीया छोरी रिषिका पेटमै थिइन् । दिपकले दुई वर्षीया छोरीलाई काँखमा समेत खेलाउन पाउनुभएन । विदेशिनुको पीडा, परिवारको प्रतीक्षा र अचानक आएको मृत्युको खबरले परिवारलाई दुःखको सागरमा डुबाएको छ ।

मलेसियाको एक प्लास्टिक फ्याक्ट्रिमा करिब एक दशकभन्दा बढी समयदेखि कार्यरत दिपक शुक्रबार अचालन बिरामी भएपछि अस्पताल भर्ना हुनुभएको खबर साथीमार्फत प्राप्त भएको उहाँका आफन्तको भनाइ छ ।  

“मेरो श्रीमानको मृत्यु के कारणले भएको हो थाहा छैन । सरकारले यसबारे सत्यतथ्य पत्ता लगाएर उहाँको शव छिटो नेपाल ल्याइदिन आग्रह गर्दछु’’ उहाँले भन्नुभयो ।

रुपनी गाउँपालिका अध्यक्ष दिनेशकुमार यादवले मृतकका बालबालिकाको पढाइ–लेखाइमा सहयोग गर्ने आश्वासन दिनुभएको छ । उहाँले गाउँपालिकाको तर्फबाट हुने सक्दो सहयोग गर्ने प्रतिबद्धता जनाउनुभयो ।