जेसिज सम्मेलनले दमौलीमा बढायो चहलपहल, व्यवसायी उत्साहित

अमरराज नहर्की
तनहुँ, भदौ १४ गते । दमौलीमा शनिबारदेखि सुरु हुन लागेको नेपाल जेसिज  सम्मेलनले गर्दा यहाँको बजारमा चहलपहल बढेको छ । होटल, लज र रेष्टुरेन्ट पाहुनाले भरिएपछि स्थानीय व्यवसायी उत्साहित बनेका छन् । व्यास नगरपालिका–३ मालपोतलाईन, दमौलीमा रहेको भानु खाजा घरकी सञ्चालिका राधिका कुँवरले सम्मेलनले गर्दा व्यापार दोब्बर बढेको अनुभव सुनाउँदै भन्नुभयो, “यस्ता कार्यक्रम बेलाबेला हुने हो भने जिल्लाको व्यवसाय अझै फस्टाउँछ ।”

व्यास जेसिज नगरको आयोजनामा शनिबारदेखि सुरु हुने दुई दिने सम्मेलनमा क्षेत्र ‘ख’ अन्तर्गतका ४२ शाखाका प्रतिनिधि, पूर्व तथा वर्तमान पदाधिकारी, अन्य क्षेत्रका शाखा प्रतिनिधि, जुनियर जेसिज, देशभरका प्रतिनिधि तथा पर्यवेक्षक गरी करिब आठ सय सहभागी हुने जानकारी सम्मेलन निर्देशक सुरेश पुरीले दिनुभयो । सहभागीहरूको बसोबासका लागि दमौली आसपासका होटल र लजहरू प्रयोग गरिएको छ ।

शाखा अध्यक्ष सुमित ढुङ्गानाका अनुसार सम्मेलनले तनहुँका धार्मिक, सांस्कृतिक तथा पर्यटकीय क्षेत्रको प्रचार–प्रसार गर्दै आन्तरिक तथा बाह्य पर्यटनलाई दीर्घकालीन रूपमा प्रोत्साहन गर्ने लक्ष्य लिएको छ । उहाँले कार्यक्रममा नेतृत्व तथा व्यक्तित्व विकाससम्बन्धी तालिम, छलफल र बहस हुने जानकारी दिनुभयो ।

व्यास–३ स्थित दमौली सभाहलमा हुने सम्मेलनको गण्डकी प्रदेशका मुख्यमन्त्री सुरेन्द्रराज पाण्डेले शनिबार उद्घाटन गर्ने कार्यक्रम तय भएको छ । उद्घाटनका अवसरमा जातीय, धार्मिक, भेषभूषा र संस्कृतिलाई झल्काउने झाँकीसहित पदयात्रा समेत आयोजना गरिनेछ ।

कार्यक्रममा नेपाल जेसिजका पूर्व राष्ट्रिय सिनेटर अरुणेश्वर खनालले कार्यपत्र प्रस्तुत गर्नुहुनेछ भने नविल बैंकका प्रमुख कार्यकारी अधिकृत मनोज ज्ञवाली र मानव सेवा आश्रमका अध्यक्ष रामजी अधिकारीले टिप्पणी गर्नेछन् । प्रवक्ता कृष्ण सुनारका अनुसार सम्मेलनले तनहुँको पर्यटन र व्यवसायलाई दीर्घकालीन टेवा पुग्ने विश्वास गरिएको छ । सम्मेलनमा करिब ६० लाख रुपियाँ खर्च हुने अनुमान गरिएको जेसिआई व्यास नगरले जनाएको छ ।