दर्जनभन्दा बढी आयोजना अलपत्र

सिँजा समाचारदाता 

सिँजा (जुम्ला), भदौ १४ गते । जुम्लामा सञ्चालित दर्जनभन्दा बढी आयोजना अलपत्र परेका छन् । स्थानीय तह र सरकारी कार्यालयद्वारा सञ्चालित आयोजना अलपत्र परेका हुन् । पातारासीको हाइअल्टिच्युट ट्रेनिङ सेन्टर, जग्गा विवादले लुमको पक्की पुल, गुठीचौरमा पुल सम्पन्न भए पनि पालिकाले चासो नदिँदा पुल प्रयोगविहीन, सिँजाको जाँचमा निर्माण भएको पुल प्रयोगविहीन तथा नाग्म–गमगढी सडकको बालुवाखोला र गुठीजिउलामा पक्की पुल निर्माण अलपत्र परेका छन् । 

त्यस्तै करिब एक दशकदेखि बहुउद्देश्यीय सभा हल अलपत्र अवस्थामा छ । जिल्ला प्रहरी कार्यालयको भवन पनि अलपत्र अवस्था छ । विकासनिर्माणसँग सम्बन्धित सघन सहरी विकास तथा भवन निर्माण आयोजना, सडक डिभिजन, पूर्वाधार विकास कार्यालयलगायतका कार्यालय प्रमुखसँग अलपत्र योजनाका विषयमा जुम्लाका राजनीतिक दलले बिहीबार छलफल गरेका छन् । जिल्लाको विकासमा भएको ढिलासुस्ती र अलपत्र आयोजनालाई गति दिने विषयमा छलफल भएको हो । निर्धारित समयभन्दा ढिला भएको, गुणस्तरहीन योजना निर्माण भएको तथा अधिकांश योजना अलपत्र परेकाले दलले चासो देखाएका छन् । सघन सहरी विकास तथा भवन निर्माण आयोजनामार्फत जुम्लामा सञ्चालित आयोजना हरिबहादुर रङ्गशाला निर्माण, बिच बजारमा सिलेट ढुङ्गा बिछ्याउने काम, वडा नं. १० को सडक निर्माण गर्ने, बजार क्षेत्रमा सडक कालोपत्रे गर्ने र जुगाडखोला कोरिडोर निर्माणमा निकै ढिलासुस्ती भएको नेकपा (एमाले) जुम्लाका अध्यक्ष शान्तिलाल महतले बताउनुभयो । 

कार्यालयमा आएको करोडौँ बजेट खर्च नभएर फिर्ता जाने र योजना समयमा सम्पन्न नभई अलपत्र पर्ने प्रवृत्ति भएको भन्दै उहाँले कार्यालय प्रमुखको ध्यानाकर्षण गराउनुभयो । सडक डिभिजनको कार्यक्षेत्रमा पर्ने कर्णाली राजमार्ग अन्तर्गतको जुम्ला खण्डमा गुणस्तरहीन कालोपत्रे भएकोमा ध्यानाकर्षण गराइएको छ । रास्वपाका जिल्ला संयोजक मक्कर भण्डारीले जुगाडखोला कोरिडोरदेखि रङ्गशाला निर्माणमा चरम लापर्बाही भएको औँल्याउनुभयो ।

बसपार्क निर्माण भए पनि प्रयोगविहीन छ भने खेलकुद विकास समितिको आडमै रहेको भलिबल प्याराफिट बजेट अभावले अलपत्र छ । त्यस्तै सात करोडमा निर्माण भएको एकीकृत भवन अझै सञ्चालनमा आउन सकेको छैन । त्यहाँ सर्ने भनेका कार्यालयहरू वार्षिक लाखौँ भाडा तिर्न बाध्य छन् । जुम्लाकै पहिलो हरिबहादुर रङ्गशाला निर्माण पनि सुस्त रहेको जिल्ला समन्वय समिति जुम्लाका प्रमुख गौरीनन्द आचार्यले बताउनुभयो ।