रामकृष्ण बोहोरा
बागलुङ, भदौ १४ गते । बागलुङ नगरपालिका–४, कुँडुले फेदीस्थित रङ्गवैकटेश मुक्तिनारायणको मन्दिरपरिसरमा रहेको शालिग्राम सङ्ग्रहालयमा भारतीय पर्यटकको सङ्ख्या बढ्दो छ । सुरुङभित्र गुफा निर्माण गरी सङ्गृहीत गरिएका सवा लाख शालिग्राम शिलाको अवलोकन तथा दर्शन गर्न आउने धार्मिक पर्यटकमध्ये भारतीयको सङ्ख्या बढ्दो छ । शालिग्राम शिलालाई भगवान् विष्णुको प्रतीकका रूपमा पुजिन्छ ।
शालिग्रामको सान्निध्यमा आउन पाउँदा संसार जिते जस्तो अनुभूति भएको भारतको उत्तर प्रदेशका धर्मेन्द्रप्रताप सिंहले बताउनुभयो । पछिल्लो समय प्याकेज नै बनाएर शालिग्राम सङ्ग्रहालय हुँदै मुक्तिनाथ मन्दिरको दर्शनका लागि आउने भारतीय पर्यटकको सङ्ख्या बाक्लिँदै गएको छ । एउटै गुफाभित्र फरक फरक आकारका सवा लाख शालिग्राम शिलाको दर्शन गर्न पाउनु साक्षात् भगवान्को दर्शन सरह रहेको भारत तमिलनाडुका श्रीराम दासले सुनाउनुभयो ।
मुक्तिनाथ मन्दिर पुग्ने हरेक पर्यटक र भक्तजन भित्र्याउने गरी बनेका संरचना तथा संसारमै नमुनाका रूपमा रहेको सङ्ग्रहालय अवलोकन र भ्रमणका लागि आउने पर्यटकमध्ये अधिकांश भारतीय रहेका सङ्ग्रहालयका संरक्षक स्वामी ऋषि प्रपन्नाचार्यको भनाइ छ । तीन मिटरको उचाइमा ‘सेमी सर्कल’ प्रविधिमा निर्माण गरिएको सङ्ग्रहालयभित्र कालीगण्डकीको शिर दामोदरकुण्डदेखि त्रिवेणीधामसम्मका आकृति अवलोकन गर्न सकिन्छ । सङ्ग्रहालयपरिसरमा रङ्गवैकटेश मुक्तिनारायणको मन्दिरसमेत छ । सङ्ग्रहालयमा शालिग्राम अवलोकन गर्नेले मन्दिरमा पूजाआराधना गर्न छुटाउँदैनन् । शालिग्राम शिला पाइने एकमात्र नदी कालीगण्डकीको महत्व दर्साउन मन्दिरले बेला बेलामा शालिग्राम महोत्सवसमेत गर्दै आएको छ । बागलुङ कालिका भगवती, मुस्ताङको मुक्तिनाथ दर्शन गर्न जाने हजारौँ पर्यटक अहिले सङ्ग्रहालयमा पुग्न थालेका छन् ।
१० करोड रुपियाँभन्दा बढी लगानीमा धार्मिक महत्वका संरचना निर्माण गरिएपछि सङ्ग्रहालय आउने पर्यटकको सङ्ख्या हरेक वर्ष बढ्दो छ । चाडपर्व र बिदाको समयमा धेरै पर्यटक शालिग्राम सङ्ग्रहालय पुग्ने गर्छन् । खास गरी दक्षिण भारतका पर्यटक बढी आउने गरेका मन्दिरका अध्यक्ष तथा सङ्ग्रहालयका संरक्षक ऋषि प्रपन्नाचार्यले बताउनुभयो । गत आवमा एक लाखभन्दा बढी पर्यटकले शालिग्राम अवलोकन गरेका थिए ।
-original-thumb.jpg)
