गोरखापत्र समाचारदाता
काठमाडौँ, भदौ १४ गते । त्रिभुवन विश्वविद्यालयका उपकुलपति प्राडा दीपक अर्यालले त्रिभुवन विश्वविद्यालयका विभिन्न क्याम्पस तथा कार्यालयमा रहेका पुस्तकालयलाई विद्युतीकरण गर्ने बताउनुभएको छ ।
१८ औं पुस्तकालय दिवसका अवसरमा त्रिवि केन्द्रीय पुस्तकालयद्वारा शुक्रबार आयोजित कार्यक्रमलाई सम्बोधन गर्दै उपकुलपति अर्यालले पुस्तकालयमा प्रविधिको विस्तारलाई जोड दिइएको बताउनुभयो । पुस्तकालय ज्ञान र इतिहासको धरोहर रहेको उल्लेख गर्दै उपकुलपति अर्यालले पुस्तक अध्ययन, अनुसन्धानात्मक जर्नल प्रकाशन र पुस्तकालयको विकासमा केन्द्रीय पुस्तकालयले महत्वपूर्ण भूमिका निर्वाह गरेको बताउनुभयो ।
कार्यक्रममा विज्ञान तथा प्रविधि अध्ययन संस्थानका पूर्वडिन प्राडा विनिल अर्यालले नेपालमा अनुसन्धान लेख प्रकाशनको वर्तमान अवस्था, नेपाली जर्नल र अन्तर्राष्ट्रिय जर्नलको सङ्क्षिप्त समीक्षा गर्नुभएको थियो । सो अवसरमा उहाँले यस विषयमा कार्यपत्रसमेत प्रस्तुत गर्नुभएको थियो । कार्यक्रममा मानवशास्त्र केन्द्रीय विभागका सहप्राध्यापक डा. मनबहादुर खत्री तथा पोटेन्ट मिडिया होमका कार्यकारी निर्देशक सुरेश रिजालले कार्यपत्र प्रस्तुत गर्नुभएकोथियो ।
