गोरखापत्र समाचारदाता
काठमाडौँ, भदौ १४ गते । अख्तियार दुरुपयोग अनुसन्धान आयोगले नापी कार्यालय भैरहवा, रुपन्देहीमा कार्यरत नापी अधिकृत सुग्रीव यादवविरुद्ध भ्रष्टाचार मुद्दा दायर गरेको छ । पदीय मर्यादाविपरीतका कार्य गरी गैरकानुनी सम्पत्ति आर्जन गरेको आरोपमा आयोगले यादवविरुद्ध शुक्रबार विशेष अदालत काठमाडौँमा भ्रष्टाचार मुद्दा दायर गरेको हो । माथिल्लो विभागीय प्रमुख र राजनीतिक व्यक्तिलाई प्रभावमा पारी प्रमुख नापी अधिकृत (उपसचिव) कार्यालय प्रमुख रहने दरबन्दी रिक्त बनाई, वैदेशिक अध्ययनमा गएका कर्मचारीको पद, दरबन्दी कायम गरी १० औंँ वर्ष निमित्त कार्यालय प्रमुख पदमा रही, सरकारी सार्वजनिक जग्गा हाल साबिक, प्लट मिलान गर्ने नाममा सार्वजनिक जग्गा व्यक्तिका नाउँमा पारी करोडौँको आर्थिक चलखेल गरेको आरोप पनि आयोगले यादवविरुद्ध लगाएको छ ।
आयोगले यादवले सार्वजनिक पद धारण गरेको मिति २०५३ असार १३ देखि २०८१ असार १६ गतेसम्मको आयव्ययको हिसाब गरेको थियो । सो अवधिमा यादवको नौ करोड तीन लाख पन्चानब्बे हजार ४४४ रुपियाँ वैध आय भएको देखिएको आयोगले जनाएको छ तर सो अवधिमा चौध करोड ८३ लाख ५७ हजार ८८४ रुपियाँ खर्च तथा लगानी गरेको देखिएको आयोगले जनाएको छ ।
आयोगले यादवलाई आम्दानीबाट खर्च घटाउँदा देखिएको पाँच करोड ७९ लाख ६२ हजार ४४४ रुपियाँ बिगो माग गरेर भ्रटाचार निवारण ऐन अनुसार कारबाहीको माग गरेको छ । यादवले राष्ट्रसेवक पदमाबहाली भएपश्चात् वार्षिक रूपमा पेस गरेको सम्पत्ति विवरणमा वास्तविक सम्पत्तिको विवरण उल्लेख नगरी सम्पत्ति लुकाइछिपाई झुटा विवरण पेस गरेकोसमेत आयोगले जनाएको छ । सम्पत्ति लुकाएको हुनाले उनलाई भ्रष्टाचार निवारण ऐनको कसुरमा लुकाइछिपाई राखिएको सम्पत्ति जफत हुने र गैरकानुनी आर्जन गरेको सम्पत्तिबाट पाँच करोड ७९ लाख ६२ हजार ४४४ रुपियाँ बिगो असुल गर्न पनि आयोगले माग गरेको छ । साथै सार्वजनिक सेवाको पदमा रहँदा यादवले अख्तियारको दुरुपयोग गरी गैरकानुनी रूपमा सम्पत्ति आर्जन गरेको स्रोत नखुल्ने सम्पत्तिबाट श्रीमती गायत्री यादव, छोरा सुधान्सु यादव र शुभम यादवका नाममा खरिद गरेको देखिएकाले बिगो जफत प्रयोजनको तिनै जनालाई प्रतिवादी कायम गरिएको छ ।
