गंगा कुमारी मिजार
रसुवा, भदौ १३ गते । गत साउन १४ गते चीनतर्फको लेन्देखोलाबाट आएको बाढीले क्षति गरेको स्याफ्रुबेसी–रसुवागढी सडक खण्डअन्तर्गत स्याफ्रुबेसीदेखि टिमुरेसम्मको आवागमन आजदेखि पुनः सुरु भएको छ।
गल्छी–त्रिशुली–मैलुङ–स्याफ्रुबेसी–रसुवागढी सडक आयोजनाअनुसार रोङ्गा खोला र मेदाङपुदुङबिचको मर्मत तथा पुनर्निर्माण कार्य पूरा भएपछि करिब १३ किलोमिटर सडक सञ्चालनमा आएको हो। करिब एक महिनादेखि अवरुद्ध यो खण्ड पुनः खुलेसँगै स्थानीयवासी र यात्रुहरूलाई सहज आवागमनको सुविधा मिलेको छ।
सडक आयोजनाका इन्जिनियर रुपनारायण पौडेलका अनुसार टिमुरेदेखि नेपाल–चीन सीमा रसुवागढीसम्मको करिब ३ किलोमिटर सडकमा अझै मर्मत कार्य बाँकी छ। स्याउपार्किङ र घट्ठेखोलामा भएको कटानका कारण पुनर्निर्माण कार्य शनिबारदेखि सुरु हुने र भौगोलिक जटिलताका कारण कम्तिमा एक सातासम्म समय लाग्ने अनुमान गरिएको छ।
हाल खुलाइएको खण्डमा साना सवारीसाधनलाई मात्र सञ्चालन अनुमति दिइएको छ । आवश्यक मर्मत पूरा भएपछि ठुला गाडी सञ्चालन गर्ने योजना रहेको पनि पौडेलले जानकारी दिनुभयो।
यसैबिच, नेपाल–चीन सीमा रसुवागढीमा बेलिब्रिज निर्माण कार्य तीव्र गतिमा भइरहेको प्रमुख जिल्ला अधिकारी राजेश पन्थीले जानकारी दिनुभयो। चीनतर्फको फाउन्डेसन निर्माण सकिएको र नेपालतर्फको निर्माण कार्य सुरु हुने चरणमा रहेको उहाँले बताउनुभयो । भदौ ३० गतेभित्र बेलिब्रिज निर्माण पूरा गर्ने लक्ष्य राखिएको छ।
