करुण अर्याल
बेइजिङ्ग, भदौ १३ गते । चिनियाँ राष्ट्रपति सि चिनफिङको औपचारिक निमन्त्रणामा साङ्घाई सहयोग सङ्गठन (एससीओ) को २५ औँ शिखर सम्मेलन र जापानी उपनिवेशविरुद्ध चीनले विजयी प्राप्त गरेको र विश्व फासिस्ट विरोधी दिवसको ८० औँ वार्षिकोत्सवमा भाग लिन प्रधानमन्त्री केपी शर्मा ओली नेतृत्वको प्रतिनिधिमण्डल शनिबार चिनियाँ शहर तियान्जिन आउँदैछ ।
प्रतिनिधिमण्डलमा प्रथम महिला राधिका शाक्य, शिक्षा विज्ञान तथा प्रविधिमन्त्री रघुजी पन्त, संस्कृति पर्यटन तथा नागरिक उडड्यनमन्त्री बद्रीप्रसाद पाण्डे, प्रधानमन्त्रीका आर्थिक तथा विकास सल्लाहकार डा.युवराज खतिवडा, नेपाली कांग्रेसका उपसभापति तथा सांसद पूर्णबहादुर खडका, नेकपा (एमाले) का सचिव तथा सांसद छविलाल विश्वकर्मा, परराष्ट्र मन्त्रालयका अधिकारीहरु रहनु हुनेछ ।
चिनियाँ राष्ट्रपति चिनफिङले उदघाटन गर्ने शिखर सम्मेलनमा एससीओका दश पूर्ण राष्ट्रसहित २० देशका राष्ट्र प्रमुख र सरकार प्रमुख तथा दशवटा अन्तर्राष्ट्रिय संस्थाको प्रमुखको सहभागिता निश्चित रहने भएको छ ।
भदौ १४–१५ गतेसम्म तियान्जिनमा हुने सम्मेलनमा भारतका प्रधानमन्त्री नरेन्द्र मोदी, रुसका राष्ट्रपति भ्लादमिर पुटिन, बेलारुसका राष्ट्रपति अलेक्ज्यान्डर लुकासेन्को, इरानका राष्ट्रपति मसुद पेजेस्कियान, पाकिस्तानका प्रधानमन्त्री सहबाज सरिफ, कम्बोडियाका प्रधानमन्त्री हुन मनेत, टर्कीका राष्ट्रपति रेसिप तैयिप एर्दोगान, माल्दिप्सका राष्ट्रपति मोहम्मद मुइज्जु लगायतको उपस्थितिका लागि निमन्त्रणा पठाइएको चीनका परराष्ट्र मन्त्रालयका उपमन्त्री लु विनले प्रेस सम्मेलनमार्फत जानकारी दिनुभयो ।
सम्मेलनमा संयुक्त राष्ट्र सङ्घका महासचिव एन्टेनियो गुटरेस पनि सहभागी हुनु हुनेछ । नेपाल सन् २०१६ मा एससीओमा संवाद साझेदारको रुपमा आवद्ध भएको थियो । सन् २००१ मा चीन, काजाकिस्तान, कीर्गिस्तान, रूस, ताजिकिस्तान र उज्बेकिस्तानद्वारा स्थापित सङ्घाई सहयोग सङ्गठनमा भारत, पाकिस्तान, इरान र बेलारुस पूर्ण सदस्य रहेका छन् । युरेशियन राजनीतिक, आर्थिक र अन्तर्राष्ट्रिय सुरक्षा सङ्गठनको रुपमा स्थापना भएको एससीओमा नेपालसहित कतार, श्रीलङ्का, टर्की, कम्बोडिया, अजरबैजान, मालद्धिप्स, म्यान्मार, संयुक्त अरब इमिरेट्स, आर्मेनिया, इजिप्ट, साउदी अरब, बहराइन र कुबेत संवाद साझेदार तथा मङ्गोलिया र अफगानिस्तान पर्यवेक्षकको रुपमा रहेका छन् ।
प्रधानमन्त्री ओली र चिनियाँ राष्ट्रपति चिनफिङबिच शनिबार नै द्धिपक्षीय भेटवार्ता हुने छ । प्रधानमन्त्री ओलीले भदौ १६ गते सम्मेलनमा अतिथिको रुपमा सम्बोधन गर्नु हुनेछ ।
प्रधानमन्त्री ओली भदौ १८ गते बेइजिङ्गस्थित तियानमिन स्क्वायरमा हुने जापानी उपनिवेशविरुद्ध चीनले विजयी प्राप्त गरेको र विश्व फासिस्ट विरोधी दिवसको ८० औँ वार्षिकोत्सवमा हुने स्मृति समारोह तथा सैनिक परेडमा सहभागी हुनु हुनेछ ।
सो समारोहमा २६ देशका राष्ट्र प्रमुख र सरकार प्रमुख सहभागी हुँदैछन् । जसमा रुसका राष्ट्रपति भ्याद्मिर पुटिन, उत्तर कोरियाका राष्ट्रपति किम जोङ उन, कम्बोडियाका राजा सिहामोनी, भियतनामका राष्ट्रपति, इण्डोनेशियाका राष्ट्रपति, मङ्गोलियाका राष्ट्रपति, मलेशियाका प्रधानमन्त्री, पाकिस्तानका प्रधानमन्त्री, मालदिप्सका राष्ट्रपति लगायत रहनु भएको छ । चीन भ्रमणका व्रmममा प्रधानमन्त्री ओलीले विभिन्न देशका सरकार प्रमुख र राष्ट्र प्रमुखहरुसँग द्विपक्षीय भेटवार्ता गर्नु हुनेछ ।
