सिराज खान
नेपालगन्ज, भदौ १३ गते । भारतबाट अवैधरुपमा नेपाल भित्र्याइएको २३ लाख रुपियाँभन्दा बढीको औषधी सशस्त्र प्रहरीले सीमा नाका नजिकबाट बरामद गरेको छ ।
नेपालगन्ज उपमहानगरपालिका –१८, लगदहवाबाट सशस्त्र प्रहरी बल नेपाल बीओपी जयसपुरको टोलीले चेकजाँच गर्नेक्रममा २३ लाख तीन हजार ६४० रुपियाँको बीनएन अल्को ड्रप्स नामक औषधी बरामद गरेको सशस्त्र प्रहरी बल नेपाल ३० नम्बर गण बागेश्वरी हेडक्वाटर बाँकेका प्रमुख शसस्त्र प्रहरी उपरीक्षक शोभाकान्त खनालले बताउनुभयो ।
उहाँले बरामद गरिएका औषधी नेपाल भित्र्याउने क्रममा आवश्यक कागजात नभएको तथा भन्सार शुल्क नतिरी ल्याइएको प्रारम्भिक अनुसन्धानबाट खुलेको बताउनुभयो ।
सशस्त्र प्रहरीले बरामद गरेका औषधीहरू आवश्यक कारवाही तथा थप अनुसन्धानका लागि नेपालगन्ज भन्सार कार्यालयमा बुझाइएको जनाइएको छ । सो औषधी कहाँबाट ल्याइएको हो र यसमा संलग्न व्यक्ति वा समूहको हुन भन्नेबारे थप अनुसन्धान भइरहेको सशस्त्र प्रहरी बल नेपाल ३० नम्बर गण बागेश्वरी हेडक्वाटर बाँकेका प्रमुख शसस्त्र प्रहरी उपरीक्षक खनालले बताउनुभयो ।
सशस्त्र प्रहरीले पछिल्ला दिनमा जिल्लाको मूख्य नाका र आसपासका नाकामा भन्सार छली तथा अवैध व्यापार नियन्त्रण गर्न चेकजाँच कडा पारेको छ । सोही कारणले दिनदिनै सीमापारीबाट ल्याइएका सामानहरु बरामद हुँदैआएका छन् ।
