नवराज नेपाली
बागलुङ (गलकोट), भदौ १३ गते । भूमि समस्या समाधान आयोग बागलुङले आफ्नो कामलाई द्रुतगतिमा अगाडि बढाएको छ । आयोगले जिल्लाका विभिन्न पालिकामा निस्सा वितरण र पुर्जा उपलब्ध गराउने प्रक्रिया अन्तिम चरणमा पुगाएको हो ।
बागलुङ नगरपालिका, गलकोट नगरपालिका बरेङ गाउँपालिका र ताराखोला गाउँपालिकामा काम अन्तिम चरणमा पुगिसकेको र यसै महिनाभित्र निस्सा र पुर्जा वितरण गर्ने तयारी भइरहेको आयोगका विज्ञ सदस्य उमेश गौतमले जानकारी दिनुभयो।
जिल्लाका १० पालिकाहरुमध्ये ताराखोला गाउँपालिका, बागलुङ नगरपालिका, गलकोट नगरपालिका र बरेङ गाउँपालिकामा निस्सा वितरण गर्ने काम अन्तिम चरणमा रहेको उहाँले बताउनुभयो । त्यस्तै, जिल्लाको जैमिनी नगरपालिका, निसिखोला गाउँपालिका, तमानखोला गाउँपालिका, काठेखोला गाउँपालिका, बडिगाड गाउँपालिका र ढोरपाटन नगरपालिका पनि काम द्रुत गतिमा सुरु गर्ने प्रक्रिया अगाडि बढाइरहेको आयोगका सदस्य केशरबहादुर थापाले जानकारी दिनुभयो । उहाँले भन्नुभयो, “पालिकाले समयमा सहयोग गरे दशैं अगाडि नै कम्तिमा दुई हजारभन्दा बढी जनालाई निस्सा वितरण गर्ने लक्ष्यसहित आयोग अगाडि बढिरहेको छ’’ थापाले भन्नुभयो । यस्तै केही पालिकाहरुमा नापी कार्य चलिरहेको आयोगले बताएको छ।
आयोगका अनुसार बागलुङ अहिलेसम्म भूमिहीन दलित, अव्यवस्थित बसोबास र भूमिहीन सुकुम्वासी २ हजार ७ सय २५ जनाले आयोगमा आवेदन इन्ट्री भएको र केही पालिकाहरुको आयोगको सफ्टवेयरमा इन्ट्री हुने प्रक्रिया अगाडि बढीराखेको बताइएको छ ।
आयोगले जिल्लाबासी सम्पूर्ण आवेदन दिन छुट भएको भूमिहीन दलित, अव्यवस्थित बसोबास र भूमिहीन सुकुम्वासी नागरिकलाई असोज ३ गतेभित्र सम्वधित वडामा गएर आवेदन दिन आग्रह गरेको छ।
