जनार्जन खत्री
सर्लाही, भदौ १३ गते । सर्लाहीको लालबन्दी नगरपालिका–८, खतिवडा चोकबाट प्रहरीले लागूऔषध गाँजासहित एक युवकलाई पक्राउ गरेको छ ।जिल्लाको चुरेवर्ती क्षेत्र लालबन्दी नगरपालिका –१४, नारायणखोला कामिटारका २० वर्षीय सन्ते ब्लोन गाँजासहित पक्राउ परेका हुन् । चुरेभेगबाट गाँजा ल्याइँदै गरिएको सूचना पाएपछि प्रहरी टोली परिचालन भएको थियो ।
त्यस क्रममा नारायणखोलाबाट पत्थरकोट हुँदै लालबन्दीतर्फ आउँदैगरेको बागमती प्रदेश ०२–०४२ प ४०५३ नम्वरको मोटरसाइकल राोक्न खोज्दा मोटरसाइकलमा सवार दुई युवक भाग्न खोजेका थिए । मोटरसाइकल र साथमा भएको झोला छाडेर खेतैखेत भागेका युवकमध्ये कामिटारका ब्लोनलाई पक्राउ गर्न सफल भएको र अर्का युवक फरार भएका इलाका प्रहरी कार्यालय लालबन्दीका प्रहरी निरीक्षक वीरेन्द्रसिंह जोहारीले जानकारी दिनुभयो ।
प्रहरीलाई देखेपछि युवकहरुले फालेको झोला भित्रबाट पाँचवटा पोकामा रहेका २७ केजी गाँजा बरामद भएको इन्स्पेक्टर जोहारीले बताउनुभयो । ब्लोनलाई हिरासतमा राखी अनुसन्धान भइरहेको छ प्रहरीको भनाइ छ । फरार रहेका मोटरसाइकलमा सवार अर्का व्यक्तिको खोजी जारी रहेको लालबन्दी प्रहरीले जनाएको छ ।
