बिकास अधिकारी
पश्चिम नवलपरासी, भदौ १३ गते । नवलपरासीको सदरमुकाम परासीदेखि बर्दघाट नगरपालिकाको नारायणचोकसम्म जोड्ने साढे १२ किलोमिटर हुलाकी सडक निर्माण थालेको एक दशक हुन लाग्दा समेत निर्माण सम्पन्न भएको छैन ।
संघीय सरकारको लगानीमा हुलाकी राजमार्ग योजना कार्यालय कपिलवस्तुबाट निर्माण भइरहेको उक्त सडकको काम निर्माण थालेको नौ वर्ष पूरा हुँदा समेत पूर्ण रुपमा सम्पन्न भएको छैन । हालसम्म भौतिक प्रगति करिब ८५ प्रतिशत छ भने वित्तीय प्रगति ७२ प्रतिशत छ । काम पूरा नगरेकाले भुक्तानी रोकिएको हुलाकी राजमार्ग योजना कार्यालय कपिलवस्तुका इन्जिनियर पबित्रमणि आचार्यले जानकारी दिनुभयो ।
विभिन्न ठाउँमा कालोपत्रको गुणस्तरबारेमा प्रश्न उठेकाले पुनः कालोपत्र गर्न भनिएको छ । ट्राफिक चिन्ह, कम चौडाइ भएको स्थानमा सडक फराकिलो बनाउनुपर्ने लगायतका काम बाँकी नै छ ।
ठेकेदारले भने गत वर्षदेखि काम गरेको छैन् । २२ करोड ७० लाखको लागतमा उक्त सडक निर्माणको ठेक्का कञ्चनजङ्गा बिरुवा जेभी काठमाडौंले लिएको थियो । ठेकेदारको भुक्तानी रोकेर पटक पटक ताकेता गरिदैआएको भए पनि काम गर्न ठेकेदारले आलटाल गरेको आचार्यले बताउनुभयो ।
पाँच पटकसम्म म्याद थप गरेर मात्र ठेकेदारले कालोपत्रको काम पूरा गरेको थियो तर ठाउँ ठाउँमा कालोपत्र गुणस्तरअनुरूपको काम नभएको भन्दै प्राविधिकहरूले पुनः गुणस्तरीय पिच गर्न भनेका छन् ।
एक दशक बित्न लाग्दा समेत जम्मा १२ किलोमिटर सडक निर्माण हुन नसक्नु दुःखद पक्ष भएको स्थानीयवासीको भनाइ छ । उक्त सडकमा नाला निर्माण गर्नुपर्ने छ्रैन्, जसका कारण काम छिटो सक्न सहज भएको भए पनि ठेकेदारले सम्झौताअनुरूप गर्नुपर्ने अझै १५ प्रतिशत काम वर्षौदेखि अलपत्र छ ।
सोही सडक खण्डमा गत वर्ष ठेक्का लागेका चारवटा पुलको निर्माण कार्य समयमै सकिएको छ । जसका कारण वर्षायाममा आउजाउ गर्न सहज भएको छ । रामग्राम नगरपालिकाको बैकुण्ठापुर, सरावल गाउँपालिकाको गङ्गासागर, पिडुँरा र भिमटाँडी खोलामा कुल १२ करोड ४७ लाख ६१ हजारको लागतमा चार वटा पुल निर्माण भएको हुलाकी राजमार्ग योजना कार्यालयले जनाएको छ ।
