विजयकुमार साह
ढल्केबर, साउन १३ गते । धनुषाको गणेशमान चारनाथ नगरपालिका –६, गोदार चोकस्थित एक मोबाइल पसलमा चोरी गर्ने गिरोहलाई प्रहरीले नियन्त्रणमा लिइ सार्वजनिक गरेको छ ।
मोबाइल पसलमा चोरी गरेको आरोपमा गणेशमान चारनाथ नगरपालिका –७ का २० वर्षीय अर्जुन मुखिया, सोही ठाउँका २० वर्षीय सञ्जिव पासवान र गणेशमान चारनाथ नगरपालिका –५ का २२ वर्षीय कृष्ण मण्डल रहेको प्रहरीले जनाएको छ ।
इलाका प्रहरी कार्यालय ढल्केवरका प्रहरी निरीक्षक जटाशङ्कर यादवका अनुसार भदौ ६ गते विहान करिब १ः४५ बजे धनुषाधाम नगरपालिका –८, केसरकुट्टी निवासी राजकुमार साहले गोदारमा सञ्चालन गर्दैआएको राजकुमार मोबाइल पसलको सटर फोडेर चोरी भएको थियो ।
पसलबाट विभिन्न कम्पनीका ४५ थान मोबाइल सेट, दुई थान ड्रोन क्यामेरा, टेम्पर ग्लास, भित्ते घडी, हाते घडी, र नगर नगद ९८ हजार ७६५ रुपियाँसहित करिब १० लाख रुपियाँ रुपियाँ बराबरको धनमाल चोरी भएको थियो ।
घटनापछि प्रहरीले अनुसन्धान अघि बढाउँदा पसलमा जडान गरिएको सिसिटिभि फुटेजको आधारमा चोरीमा संलग्न तीन जनालाई नियन्त्रणमा लिएको हो । पक्राउ परेकाहरुको साथबाट र लुकाएको स्थानबाट विभिन्न कम्पनीका १२ थान मोबाइल, घडीलगायतका सामान बरामद गरिएको उहाँले जानकारी दिनुभयो ।
प्रहरीले पक्राउ परेका ती तीन जनामाथि चोरी तथा डकैतीसम्बन्धी कसूरमा मुद्दा दर्ता गरी थप अनुसन्धान अगाडि बढाएको जनाएको छ । घटनामा सम्बन्धमा थप अनुसन्धान जारी रहेको प्रहरी निरीक्षक यादवले जानकारी दिनुभयो ।
