तेल अभिव, भदौ १३ गते । इजरायली अर्थमन्त्री बेजलेल स्मोट्रिचले हमासले निरस्त्रीकरण गर्न अस्वीकार गरेमा गाजा पट्टीलाई इजरायलमा विलय गर्नुपर्ने प्रस्ताव राख्नुभएको अल जजिराले बताएको छ ।
बिहीबार पत्रकार सम्मेलनमा स्मोट्रिचले भन्नुभयो, “यदि हमास आत्मसमर्पण गर्न, हतियार त्याग्न र इजरायली बन्दीलाई रिहा गर्न तयार भएन भने, इजरायलले हरेक हप्ता गाजाको एक भाग कब्जा गर्दै चार हप्ताभित्र सम्पूर्ण नियन्त्रणमा लिनुपर्छ ।” उहाँका अनुसार प्रारम्भमा प्यालेस्टिनीलाई गाजाको दक्षिण भागतर्फ सर्न भनिनेछ, त्यसपछि इजरायलले उत्तर र केन्द्र क्षेत्रलाई घेराबन्दी गरी अन्ततः विलय गर्नेछ ।
स्मोट्रिचले यस प्रक्रिया तीनदेखि चार महिनाभित्र पूरा गर्न सकिने दाबी गर्दै भन्नुभयो, “यी कदम वर्षको अन्त्यसम्म गाजामा ‘विजय’ हासिल गर्ने योजनाको हिस्सा हुन् ।” इजरायली सेनाले गाजा सहरतर्फ गहिरो अग्रसर गर्दै करिब १० लाख प्यालेस्टिनीलाई विस्थापित गर्ने उद्देश्यले क्षेत्र कब्जा गर्ने प्रयासलाई तीव्र पारेको बेला उहाँको यो टिप्पणी आएको हो ।
यसबिच, संयुक्त राष्ट्रसङ्घका महासचिव एन्टोनियो गुटेरेसले गत हप्ता इजरायलको आक्रमणले ‘ठूलो मृत्यु र विनाश’ निम्त्याउने चेतावनी दिनुभएको थियो । उहाँले सैन्य आक्रमणलाई व्यापकरूपमा निन्दा गर्दै भन्नुभयो, “अनिकाल आउन लागेको होइन, यो अहिले भइरहेको विनाश हो । मानिस भोकमरीका कारण मर्दैछन्, परिवार विस्थापन र निराशाबाट टुक्रिँदै छन्, गर्भवतीले अकल्पनीय जोखिम भोगिरहेका छन् र खाना, पानी तथा स्वास्थ्य सेवा जस्ता जीवनधारणका आधारभूत प्रणाली व्यवस्थितरूपमा ध्वस्त पारिएका छन् ।”
गाजामा इजरायली नाकाबन्दीका कारण खाद्यान्न, पानी र अन्य मानवीय आपूर्तिको चरम अभाव भइरहेको छ । यसैबिच, हमासले स्मोट्रिचको टिप्पणीलाई कडारूपमा अस्वीकार गर्दै भनेको छ, “उक्त अभिव्यक्ति हाम्रा जनतालाई उन्मूलन गर्ने आधिकारिक आह्वान हो र यसले भोकमरीलाई हतियारका रूपमा प्रयोग गर्ने तथा निर्दोष नागरिकविरुद्ध घेराबन्दीलाई औपचारिक स्वीकार गरेको पुष्टि गर्दछ ।”
अल जजिराले उद्धृत गरेको विज्ञप्तिमा हमासले भनेको छ, “स्मोट्रिचको भनाइ कुनै एक व्यक्तिको चरमपन्थी विचार मात्र होइन, बरु लगभग २३ महिनादेखि लागू भइरहेको सरकारी नीतिको निरन्तरता हो । यसले विश्वसमक्ष कब्जाको वास्तविकता उजागर गरेको छ र गाजामा भइरहेको घटना सैन्य युद्ध होइन, बरु नरसंहार र सामूहिक विस्थापनको परियोजना हो भन्ने पुष्टि गरेको छ ।”
स्मोट्रिचले इजरायली प्रधानमन्त्री बेन्जामिन नेतान्याहुलाई आफ्नो विलय योजना ‘तुरुन्तै पूर्णरूपमा’ अपनाउन आग्रह गर्नुभएको छ । नेतान्याहुले यसबारे सार्वजनिकरूपमा कुनै टिप्पणी गर्नुभएको छैन । तर यसअघि उहाँले इजरायलले ‘सम्पूर्ण गाजाको नियन्त्रण लिन’ र यस क्षेत्रलाई पुनः कब्जा गर्न सक्ने सङ्केत दिनुभएको अल जजिराले उल्लेख गरेको छ । रासस/एएनआई
