मिनियापोलिस, संयुक्त राज्य अमेरिका, भदौ १२ गते । अमेरिकाको मिनियापोलिस राज्यको एक चर्चमा सेवा गरिरहेका विद्यालय जाने उमेरका बालबालिकामाथि बुधबार बन्दुकधारीले अन्धाधुन्ध गोली चलाउँदा दुई विद्यार्थीको मृत्यु हुनुका साथै १७ जना घाइते भएका छन् ।
शहरका प्रहरी प्रमुख ब्रायन ओहाराले पत्रकार सम्मेलनमा आक्रमणकारीले चर्चमा गोली प्रहार गरेको पुष्टि गर्नुभएको छ ।
मिडवेस्टर्न राज्य मिनेसोटाको सबैभन्दा ठूलो शहर मिनियापोलिसको एक सम्बद्ध क्याथोलिक विद्यालयको छेउमा उक्त चर्च अवस्थित छ।
“आठ र १० वर्षका दुई साना बालबालिकाको बेञ्चमा बसिरहेको अवस्थामा मृत्यु भएको थियो”, ओहाराले भन्नुभयो, “१४ बालबालिकासहित १७ जना घाइते भएका छन् ।”
दुई जनाको अवस्था गम्भीर रहेको उहाँले बताउनुभयो ।
बन्दुकधारीले राइफल र पेस्तोल प्रहार गरेपछि पार्किङस्थलमा आत्महत्या गरेको प्रहरी प्रमुखले बताएका छन् ।
गोली हान्ने व्यक्तिको लामो आपराधिक इतिहास नभएको र उनले एक्लैले काम गरेको अनुमान गरिएको छ । आक्रमणकारी अन्दाजी २३ वर्षको भएको बताइएको छ ।
अनुसन्धानका लागि सङ्घीय विभागका निर्देशक काश पटेलले आक्रमणकारी ‘रोबर्ट वेस्टम्यान’ रहेको बताउनुभएको छ ।
पटेलले एक्समा लेख्नुभएको छ, “एफबीआईले क्याथोलिकहरूलाई लक्षित गरी घरेलु आतङ्कवाद र घृणाजन्य अपराधको रूपमा अनुसन्धान गरिरहेको छ।
वेस्टम्यानले अनलाइनमा पोस्ट गरेको भिडियोमा केही पेज लामो आक्रमणको घोषणा र आक्रमणमा प्रयोग गरिएका हतियारको नाम र चित्र देखाइएको छ ।
यस आक्रमणको राष्ट्रपति डोनाल्ड ट्रम्पसहित धेरैले निन्दा र दुःख व्यक्त गरेका छन् । राष्ट्रपति ट्रम्पले शोकको यस घडीमा ह्वाइट हाउसमा अमेरिकी झण्डालाई आधा झुकाउन निर्देशन दिनुभएको छ ।
क्याथोलिक चर्चको नेतृत्व गर्ने पहिलो अमेरिकी पोप लियो चौधौंले यस घटनाबाट आफू निकै मर्माहत भएको बताउनुभएको छ ।
हेनेपिन काउन्टी मेडिकल सेन्टरमा छ देखि १४ वर्ष उमेर समूहका दुई वयस्क र नौ जना बालबालिकाको उपचार भइरहेको र कम्तीमा चार जनाको तत्काल शल्यक्रिया गर्नुपर्ने चिकित्सकले बताएका छन् ।
“मिनेसोटा हृदयविदारक छ,“ गभर्नर टिम वाल्जले एक्समा लेख्नुभएको छ ।
“जवाफ दिने अधिकारीहरू, पादरीहरू र शिक्षकहरूले सान्त्वना दिनेदेखि, अस्पतालका कर्मचारीहरूले जीवन बचाउनेसम्म, हामी एकसाथ मिलेर यो अवस्थाबाट पार पाउनेछौं”, उहाँले भन्नुभयो, “आफ्ना सन्तानलाई प्यार गरौँ। सावधानीपूर्वक रेखदेख गरौँ।”
प्रहरी घेराबाहिरको भिडियो फुटेजमा आत्तिएका अभिभावकहरू हरियो पोलो सर्टको विद्यालय पहिरनमा सजिएका आफ्ना साना केटाकेटीहरूलाई लिएर भागिरहेको देखिन्छ। रासस/एएफपी
