काठमाडौँ, भदौ ७ गते । प्रधानमन्त्री केपी शर्मा ओलीले बुवाको मुख हर्ने दिन भाद्र कृष्ण औँसी अर्थात् कुशे औँसीको सबैलाई शुभकामना व्यक्त गर्नुभएको छ ।
प्रधानमन्त्री ओलीले शनिबार सामाजिक सञ्जालमार्फत सबैका जीवित पिताहरूलाई नमन, दिवङ्गत पितृहरूलाई श्रद्धा व्यक्त गर्दै बुवाको मुख हेर्ने दिन सबैलाई शुभकामना गर्नुभएको हो ।
प्रधानमन्त्री ओलीले आज बिहानै बुवासँग आशीर्वाद लिएको समेत जानकारी गराउनुभएको छ । “बिहानै बुवासँग आशीर्वाद लिएँ । बुवा ९६ वर्षको हुनुभयो । कान अलि कम सुन्नुहुन्छ, पुस्तक पढ्न अझै चस्मा लगाउनुपर्दैन, नजिकसम्मका हिँडडुल गर्न सक्नुहुन्छ”, प्रधानमन्त्रीले उल्लेख गर्नुभएको छ, “बुवासँग एकछिन उतिबेलाका केही प्रसङ्गमा कुरा भए । उहाँको सुस्वास्थ्य र दीर्घायुको कामना छ ।”
प्रधानमन्त्री ओलीले आफू चार वर्षको हुँदा आमा बित्नुभएको उल्लेख गर्दै आमाको अनुहारको धमिलो सम्झना मात्र आफूसँग बाँकी रहेको बताउनुभएको छ ।
प्रधानमन्त्री ओलीले बुवाको मुख हेर्ने दिन, हाम्रो परम्परामा पितृ सम्मानको प्रतिकात्मकको दिन रहेको बताउनुभएको छ । “बुवाआमालाई एउटा विशेष दिनमा मात्र होइन, सधैँ आदर, सम्मान गर्नुपर्छ । टाढा रहेका छोराछोरी पनि यस दिन बुवाको मुख हेर्न आउने भएकाले यो विशेष दिन भएको हो”, प्रधानमन्त्री ओलीले उल्लेख गर्नुभएको छ ।
बुवाको मुख हेर्ने दिन भाद्र कृष्ण औँसीअर्थात् कुशे औँसीमा छोराछोरीले परम्पराअनुसार आ–आफ्ना बाबुलाई मन पर्ने मिठाई तथा भोजन खुवाइ आदर सम्मान प्रकट गर्ने र बाबुको मुख हेर्ने गर्दछन्
