लमजुङ समाचारदाता
लमजुङ, साउन ३० गते । गण्डकीका प्रदेश अस्पतालमध्ये लमजुङ सदरमुकाम बेँसीसहरमा रहेको अस्पतालमा सबैभन्दा बढी सेवाग्राहीले उपचार सेवा लिएका छन् ।
गण्डकी प्रदेश सरकार अन्तर्गत सञ्चालनमा रहेका ११ जिल्लाका अस्पतालमध्ये प्रदेश अस्पताल लमजुङमा आर्थिक वर्ष २०८१/८२ मा सबैभन्दा बढी सेवाग्राहीले उपचार सेवा लिएका छन् । पछिल्ला तीन आवको तथ्याङ्क हेर्दा लगातार शीर्ष स्थानमा सेवाग्राहीको उपचार भइरहेको अस्पताल व्यवस्थापन समितिका अध्यक्ष हरिजङ्ग तामाङले बताउनुभयो ।
अस्पतालमा गत आवमा एक लाख १३ हजार ८३७ जना बिरामीले सेवा लिएका थिए । त्यसै गरी आव २०८०/८१ मा एक लाख १३ हजार ४५९ जना र आव २०७९/८० मा एक लाख सात हजार ९८३ जनाले सेवा लिएका अस्पतालका प्रमुख डा. शिशिर देवकोटाले बताउनुभयो । प्रदेशभरका प्रदेश अस्तालमा बढी सेवाग्राही आउने अस्पतालमध्ये दोस्रोमा प्रदेश अस्पताल गोरखा रहेको छ । गोरखामा आव २०८१/८२ एक लाख १३ हजार ४५९ र तेस्रोमा प्रद्रेश अस्पताल तनहुँमा एक लाख सात हजार २१२ जनाले सेवा लिएका थिए ।
लमजुङको प्रदेश अस्पतालले यति ठुलो सङ्ख्यामा जनताको सेवा गर्न सफल हुनुको पछाडि दक्ष चिकित्सक, स्वास्थ्यकर्मी, प्राविधिक तथा अन्य कर्मचारीको योगदान रहेको अस्पताल प्रशासनले जनाएको छ । अस्पतालका अनुसार नियमित सुधार, सेवा विस्तार, आकस्मिक सेवा व्यवस्थापन, मातृशिशु तथा विशेषज्ञ सेवाको गुणस्तरीय पहुँचले सेवाग्राहीको विश्वास जित्न सहयोग गरेको अस्पतालले जनाएको छ ।
प्रदेश अस्पताल लमजुङमा जिल्लाभित्र र छिमेकी जिल्ला मनाङ, गोरखा र तनहुँका केही भागका बिरामी उपचारका लागि आउने गरेका छन् । अस्पतालमा पछिल्लो समय थपिएका डायलासिस, टेलिमेडिसिन, इन्डोस्कोपी र दूरबिनबाट शल्यक्रिया विधिले बिरामीको सङ्ख्या बढ्दै गएको अस्पताल प्रमुख देवकोटाले बताउनुभयो । उहाँका अनुसार हाल दैनिक चार सयदेखि पाँच सयको हाराहारीमा बिरामी उपचारका लागि आउने गरेका छन् ।
