चितवन समाचारदाता
चितवन, साउन ३० गते । बिपी कोइराला मेमोरियल क्यान्सर अस्पतालमा बोनम्यारो प्रत्यारोपण युनिट स्थापनाका लागि चिनियाँ विज्ञ टोली बिहीबार चितवन आएको छ ।
चिनियाँ टोली र क्यान्सर अस्पतालका कार्यकारी निर्देशनसहितको चिकित्सक टोलीसँग छलफल तथा परामर्श गरेको हो । बिहीबार आएको टोलीले पहिलो दिन औपचारिक रूपमा छलफल तथा अन्तव्रिर्mया गरेर यहाँको अवस्थाबारे जानकारी लिएको क्यान्सर अस्पतालका कार्यकारी निर्देशक डा. शिवजी पौडेलले बताउनुभयो ।
“आज उहाँहरूसँग औपचारिक रूपमा छलफल भएको छ । हामीले यहाँको अवस्थाको विषयमा जानकारी दिएका छौँ । भोलिबाट आन्तरिक तथा बाह्य अवस्थाका साथै अन्य विषयमा अध्ययन गर्नुहुने छ,” कार्यकारी निर्देशक पौडेलले भन्नुभयो, “प्राविधिक उपकरण, आवश्यक पर्ने भौतिक संरचनाको विषयमा अध्ययन, अहिले अस्पतालले दिइराखेको सेवा, बिरामीको चापलगायत सबै विषयमा उहाँहरूले अध्ययन गर्नुहुने छ ।”
सात सदस्यीय टोलीले पाँच दिन लगाएर गरेको अध्ययनको प्रतिवेदन सम्बन्धित निकायमा पेस गरी आवश्यक सहयोग गर्ने उहाँले बताउनुभयो । अस्पतालमा बोनम्यारो प्रत्यारोपणका लागि चीन सरकारले भवन, आवश्यक उपकरण र जनशक्ति व्यवस्थापनमा समेत सहयोग गर्ने तयारी गरेको छ । नेपाल सरकार र चीन सरकारबिच यसअघि नै बोनम्यारो प्रत्यारोपणका लागि सहयोग गर्न सम्झौता भइसकेको छ ।
बोनम्यारो प्रत्यारोपणका लागि अहिले भइराखेको सघन उपचार कक्षनजिकै दुईतले भवन निर्माण हुने छ । टोलीले रेडिएसन अङ्कोलोजी, प्रयोगशाला, मेडिकल अङ्कोलोजीलगायतका विभागले अहिले दिइराखेको सेवाको विषयमा गहन अध्ययन गर्ने छ ।
अस्पतालका कार्यकारी निर्देशक डा. पौडेलले बोनम्यारो प्रत्यारोपणका लागि आधुनिक दुईतले भवन निर्माण गरिने तयारी भइरहेको जानकारी दिनुभयो । अस्पतालसँग प्रशस्त जग्गा भएकाले पायक पर्ने स्थानमा भवन निर्माण गर्दा सेवा दिन सहज हुने उहाँले बताउनुभयो । “हामीले छिटो सबै विषयमा जानकारी दिएर निर्माण प्रव्रिmया अगािड बढाउन आग्रह गरेका छौँ,” उहाँले भन्नुभयो । भवन निर्माणका लागि स्वास्थ्य तथा जनसङ्ख्या मन्त्रालयबाट आवश्यक सम्पूर्ण प्रव्रिmया पूरा गरी वातावरणीय प्रभाव मूल्याङ्कन लागि वन तथा वातावरण मन्त्रालयमा फाइल पुगेको छ । फाइलको काम अन्तिम चरणमा रहेको कार्यकारी निर्देशक डा. पौडेलले बताउनुभयो ।
दसैँअगाडिबाट सबै प्रव्रिmया सम्पन्न भएर भवन निर्माणको काम अगाडि बढाउने पहल भइराखेको उहाँले बताउनुभयो । उहाँले भन्नुभयो, “टोलीले यस विषयमा धेरै पटक छलफल तथा अध्ययन गरिसकेकाले अब छिटो काम हुनेमा विश्वास लागेको जागेको छ ।”
अस्पतालमा रहेका २९ वटा भवनको अभिलेखीकरण गरी नक्सा पास भइसकेको छ । वातावरणीय प्रभाव मूल्याङ्कनको काम सम्पन्न भएपछि चिनियाँतर्फबाट निर्माणको काम थाल्ने तयारी छ । ढिलोमा तीन वर्षभित्रमा बोनम्यारो प्रत्यारोपणको काम सुरु हुने चिनियाँ टोलीले जानकारी दिएको कार्यकारी निर्देशक डा. पौडेलले बताउनुभयो ।
सेवा सुरु भएपछि एक वर्षमा ५० जना हाराहारीको बोनम्यारो प्रत्यारोपण गर्न सकिने उहाँले बताउनुभयो । बोनम्यारो प्रत्यारोपणका लागि अहिले अधिकांश बिरामी भारतीय अस्पतालमा जाने गरेका छन् । सेवा सुरु भए नेपालमै कम खर्चमा उपचार हुने उहाँले बताउनुभयो ।
