धर्बेन्द्र झा
जनकपुरधाम, साउन २९ गते । मधेश प्रदेशका गृह सञ्चार तथा कानुनमन्त्री राजकुमार लेखीले नागरिकलाई विपदबाट जोगाउन हामीसबैले साझा दायित्व निर्वाह गर्नुपर्ने बताउनुभएको छ ।
गृह, सञ्चार तथा कानुन मन्त्रालय मधेश प्रदेशले बिहीबार जनकपुरधाममा आयोजना गरेको विपद (सुख्खा) संकटग्रस्त प्रतिकार्य कार्ययोजना तर्जुमा कार्यक्रमलाई सम्बोधन गर्दै उहाँले यस्तो बताउनुभएको हो ।
उहाँले केही दिन परेको पानीका कारण तत्कालका लागि खानेपानी र सिँचाइको समस्या समाधान भए पनि आउने दिन पुनः यस प्रकारको समस्या आउन सक्ने भन्दै प्रदेश सरकारले विपद (सुख्खा) संकटग्रस्त प्रतिकार्य कार्ययोजना तर्जुमा गर्न लागेको बताउनुभयो ।
उहाँले विपदको सामना गर्ने कार्यमा विकास साझेदार संघ संस्थाहरुले गरेको सहयोग सराहनीय रहेको भन्दै आउने दिनमा पनि ती संघ संस्थाहरुको सहयोग रहनेमा आफू आशावादी रहेको बताउनुभयो । उहाँले भन्नुभयो, “कतिपय कामकाज हामी आफनै स्रोतबाट गर्न सक्छौ । हामीले हाम्रो दायित्व छाडेर अरुको भरमा विश्वास गर्न थालेको कारण पनि धेरैजसो समस्या आइपरेको हुन्छ ।”
मन्त्री लेखीले नहर, कुलोहरुको सरसफाईजस्ता काम हामीले आफनै स्रोत साधनबाट गर्नु पर्नेमा हाम्रो समाजले यस्ता कामका लागि पनि सरकारको सहयोगको अपेक्षा गर्न थालिएको बताउनुभयो ।
कार्यक्रममा बोल्ने बक्ताहरुले जमिन मुनिवाट हामीले पानी निकाले पनि पानी पुनरभरणको काम कहिले नभएको भन्दै चुरे भावर क्षेत्रमा पानी पुनरभरणको काम नभएसम्म समस्यावाट छुटकारा नपाइने बताउनुभयो ।
कार्यक्रममा गृह, सञ्चार तथा कानुन मन्त्रालयका सचिव विमलप्रसाद बरालले विभिन्न चारवटा क्लस्टरले तयार पारेको प्रतिकार्य कार्ययोजनामाथि छलफल गरी सुझाव लिनुभएको थियो ।
