धर्बेन्द्र झा
जनकपुरधाम, साउन २९ गते । मधेश प्रदेशका मुख्यमन्त्री सतिशकुमार सिंहले स्वास्थ्य क्षेत्रमा देखिएका विकृतिहरू अन्त्य गर्न सबैको सहयोग आवश्यक भएको बताउनुभएको छ ।
मधेश प्रदेशको राजधानी जनकपुरधाममा बिहीबारबाट सञ्चालनमा आएको आरोग्य निकेतन अस्पतालको उद्घाटन गर्दै उहाँले यस्तो बताउनुभएको हो ।
उहाँले स्वास्थ्य क्षेत्रमा सुधारका लागि विगतमा आफूले सञ्चालन गरेको अस्पताल अनुगमनको अभियानको क्रममा मधेश प्रदेशमा सञ्चालित केही अस्पतालमा विभिन्न खालका विकृतिहरू देखिएको भन्दै त्यस्ता विकृतिहरू अन्त्यका लागि सरोकारवाला सबै पक्षको निगरानी आवश्यक रहेको बताउनुभयो ।
उहाँले मधेश प्रदेशमा मापदण्डविपरीत धेरै जसो अस्पताल सञ्चालन गरिएको र त्यस्ता अस्पताललाई प्रदेश सरकारले बन्दसमेत गराएको बताउनु भयो । उहाँले एम्बुलेन्सका ड्राइभरहरूले अस्पताल खोलेर दिनदहाडै नागरिकलाई लुटने गरेको भन्दै त्यस्तो गर्ने जोकोहीलाई पनि कारबाहीको दायरामा ल्याउने बताउनुभयो ।
उहाँले अस्पताल खोल्ने क्रम बढे पनि त्यसको समुचित व्यवस्थापनको अभावमा जनकपुरधामको केही अस्पताल आफैँ बिमार अवस्थामा रहेको भन्दै अस्पताल खोल्दा व्यवस्थापकीय पक्षलाई ध्यान दिनु जरुरी रहेको बताउनुभयो ।
उहाँले खानपानका कारण मुटु रोगीको सङ्ख्या दिनानुदिन बढदै गएको भन्दै यस्तो अवस्थामा आजबाट सञ्चालनमा आएको आरोग्य निकेतन अस्पतालले मुटु रोगसम्बन्धी विभिन्न सेवा उपलब्ध गराउने भनिएकाले यस क्षेत्रका नागरिकलाई बिरामी परेको खण्डमा उपचारको सेवा लिन सहज हुने बताउनुभयो ।
उहाँले अस्पतालहरूले गरिब विपन्नका लागि छुट्याएको १० प्रतिशत शय्याको व्यवस्थाको सुविधासमेत हुने खानेले नै लिइरहेको भन्दै यस विषयमा अस्पतालहरूले विशेष ध्यान दिनुपर्नेमा जोड दिनुभयो ।
उहाँले गरिब विपन्नका लागि गरिएको विशेष व्यवस्थाको उपयोग सोही वर्गका व्यक्तिहरूले नै लिनु पर्नेमा जोड दिनुभयो । कार्यक्रमको अध्यक्षता गर्नुभएका आरोग्य निकेतन अस्पतालका अध्यक्ष डा. गोराङ्ग मिश्राले नागरिकलाई सन्तुष्ट हुने किसिमले अस्पतालबाट सेवा प्रवाह हुनेमा आफू पूर्ण विश्वस्थ रहेको बताउनुभयो ।
उहाँले अहिलेको समयमा आज सिकेको सिप भोलि गएर पुरानो हुने गरेको भन्दै समयको अपेक्षा अनुसारको प्रविधिहरू जडान गरी अस्पतालले सेवा प्रवाह गर्ने बताउनुभयो ।
कार्यक्रममा मधेश प्रदेशका पूर्व मुख्यमन्त्री लालबाबु राउत, वरिष्ठ चिकित्सक डा. विजयकुमार सिंह, डा. अमित सिंह, जनकपुरधाम उपमहानगरपालिकाका पूर्व नगर प्रमुख व्रिखेस चन्द्र लाल, बजरङ्ग साह, समाजसेवी असगर अलीलगायतको उपस्थिति थियो ।
