म्याड्रिड, साउन २९ गते । स्पेनको उत्तरपश्चिम लियोन क्षेत्रमा लागेको डढेलोमा परी थप एक जनाको मृत्यु भएको अधिकारीहरूले बिहीबार बताएका छन् । कास्टिले र लियोनका प्रिफेक्ट निकानोर सेन भेलेजले एक्समा लेख्नुभएको छ, “ लियोन प्रान्तको भाल्डेरिया क्षेत्रमा डढेलो निभाउने क्रममा थप एक व्यक्तिको मृत्यु भएको र यो डढेलोका कारण अहिलेसम्म तीन जनाको मृत्यु भएको छ । सरकार मृतकप्रति शोक व्यक्त गर्दछ ।”
स्पेनका आन्तरिक मामिला मन्त्री फर्नान्डो ग्रान्डे-मार्लास्काले घटनाको पुष्टि गर्दै मृतकका परिवार, सहकर्मी र समुदायप्रति समवेदना व्यक्त गर्नुभएको छ । गृहमन्त्रीले डढेलो नियन्त्रणका लागि सहयोगका लागि युरोपेली सङ्घसँग अपिल गरेको केही समयपछि थप एक जनाको मृत्यु भएको हो । क्षेत्रीय अधिकारीहरूले २६ इलाकाका करिब छ हजार मानिसहरूलाई उनीहरूको घरबाट बाहिर निकालिएको बताएपछि सरकारले विशेष गरी दुई वटा पानी छर्किने विमानहरूको लागि इयूसँग सहयोग मागेको थियो ।
यसअघि, म्याड्रिडबाट करिब २५ किलोमिटर टाढा डढेलोमा परी एक व्यक्तिको मृत्यु भएको थियो । त्यही साँझ लियोन क्षेत्रमा आगलागीसँग लड्दै गर्दा अर्को ३५ वर्षीय एक स्वयंसेवकको मृत्यु भएको थियो । धेरै युरोपेली देशहरूजस्तै स्पेनले पनि यस हप्ता अत्यधिक तापमानको सामना गरिरहेको छ । तापमानमा आएको वृद्धिका कारण डढेलाको जोखिम बढेको छ ।
वैज्ञानिकहरूले डढेलो र तापक्रम वृद्धिको कारक मानव प्रेरित जलवायु परिवर्तन तीव्र हुनुलाई जिम्मेबार बताएका छन् । स्पेनमा यस वर्ष १९९ वटा डढेलोका कारण करिब ९८ हजार ७८४ हेक्टर (दुई लाख ४४ हजार १०० एकड) जमिन जलेको छ, जुन सन् २०२४ को सोही अवधिमा जलेको भन्दा दोब्बरभन्दा बढी हो । रासस/एएफपी
