काठमाडौँ, साउन २९ गते । पुरुषोत्तम सिलवालले प्रथम साउथ वेस्टर्न स्टेट अन्तरकलेज बुद्धिचाल प्रतियोगिताको उपाधि जित्नुभएको छ ।
वसुन्धरास्थित आयोजककै हातामा भएको नौ चरणको प्रतियोगितामा पुरुषोत्तमले ६.५ अङ्क जोड्दै उपाधि आफ्नै कलेजमा राख्नुभएको हो ।
बिर्तामोड कलेजका मिसन दाहाल दोस्रो र सेन्ट जेभियर्सका अभिक शाह तेस्रो हुनुभयो । दुवैले समान ६–६ अङ्क जोडे पनि प्रोग्रेसिभ अङ्कका आधारमा मिसन अगाडि रहनुभएको हो । शीर्ष तीन स्थान हात पार्नेले क्रमश: ५० हजार, २५ हजार र १५ हजार रुपियाँ पुरस्कार पाउनुभयो ।
यस्तै पुल्चोक इन्जिनिएरिङ कलेजका सुजन काफ्ले चौथो, हेराल्ड कलेजका सम्यक श्रेष्ठ पाँचौँ, बिर्तामोड कलेजका रिसोन थापा छैटौँ, सोफ्टवारिकाका कुशल बेल्वासे सातौँ, बीएन एकेडेमीका अविन पाण्डे आठौँ, सेन्ट जेभियर्सका शुभम श्रेष्ठ नवौँ र कशिभ कार्की १०औँ स्थानमा रहनुभयो ।
शीर्ष १० मा रहनेलाई पनि आकर्षक नगद पुरस्कार प्रदान गरियो । महिलातर्फ द चाँदबागकी कुसुम घिसिङ पहिलो र ट्रिनिटीकी रिया श्रेष्ठ दोस्रो हुनुभयो । कुसुमले १० हजार तथा रियाले ५ हजार रुपियाँ पुरस्कार पाउनुभयो ।
विजेतालाई टोखा नगरपालिका वडा–७ का अध्यक्ष नरोत्तम राना, आयोजक साउथ वेस्टर्नका क्याम्पस प्रमुख डा.राजेन्द्र केसीलगायतले पुरस्कार प्रदान गर्नुभयो । दुईदिने प्रतियोगितामा विभिन्न ४० कलेजका १०३ खेलाडी सहभागी थिए ।
