केशव राज भट्ट
वाशुलिङ (बैतडी), साउन २६ गते । २५ जनाको क्षमता भएको कारागार कार्यालय बैतडीमा अहिले ६३ जना कैदीबन्दी र थुनुवा राख्दा बन्दीहरूको दैनिकी कष्टकर बनेको छ । भीडभाडका कारण बसाइ, स्वास्थ्य तथा सरसफाइमा समस्या कारागार कार्यालयका प्रमुख धारा भण्डारीले बताउनुभयो ।
१५ जना पुरुष र १० जना महिला गरी २५ जनाको क्षमता रहेको कारागारमा हाल ५३ जना कैदीबन्दी र १० जना थुनुवा छन् । क्षमता भन्दा बढी कैदीबन्दी हुँदा बसाइ व्यवस्थापनमा निकै समस्या भइरहेको कारागार प्रमुख भण्डारीले बताउनुभयो ।
यस्तै, भीड कम गर्न केही महिला बन्दीलाई डडेल्धुरा पठाइए पनि समस्या समाधान हुन सकेको छैन । बन्दीको बसाइ व्यवस्थापनका लागि खाट माथि खाट राखिएको छ । कैदीबन्दीहरूले पर्याप्त खुला स्थान नपाउने, भीडका कारण दम घुटिने र स्वास्थ्य जोखिम बढ्ने समस्या हुने गरेको एक कैदीबन्दीले गुनासो गरेका छन् ।
वि.सं. २०४० सालमा निर्माण भएको कारागार भवन पुरानो र जीर्ण भइसकेको छ । जस्तापाताले छाएको भवन वर्षातमा चुहिने र हिउँदमा शीत झर्ने समस्या रहेको छ । जीर्ण संरचना र भीडभाडको संयोजनले बन्दीहरूको अवस्था झन असहज बनेको उहाँको भनाइ छ ।
यसैगरी, सघन सहरी तथा भवन निर्माण आयोजना डोटीमार्फत १० करोड रुपियाँ लागतमा नयाँ कारागार भवन निर्माणका लागि ठेक्का सम्झौता भइसकेको प्रमुख भण्डारीले बताउनुभयो । आगामी असोज–कार्तिकदेखि बन्दीगृह निर्माण कार्य सुरु हुने तयारी भैरहेको कारागार कार्यालय बैतडीले जनाएको छ ।
