कैलाली, साउन १७ गते । यहाँको धनगढी उपमहानगरपालिका–७, देवरीयाका पाँच जनाको महिला समूहले दुना–टपरी बनाएर आत्मनिर्भर बनेका छन् । स्थानीय सीता चौधरी, कमला चौधरी, भुलिया चौधरी, विनिता रेग्मी र सविता चौधरीले दुई वर्षदेखि देवरियामा ‘जाखौरबाबा महिला विकास दुना टपरी उद्योग’ सञ्चालन गर्दैआएका छन् ।
उहाँहरूले सुरुमा वडा कार्यालयबाट दुनाटपरी बनाउने तालिम लिनुभएको थियो । वडा कार्यालय र धनगढी उपमहानगरपालिकाले सो समूहलाई दुनाटपरी बनाउने दुई वटा मेसिन निःशुल्क उपलब्ध गराएको छ । मेसिनको प्रयोगले दुनाटपरी उत्पादन गर्न अझै सहज भएको छ । दुनाटपरी उद्योग सञ्चालक मध्येकी सीता चौधरीले वडाबाट प्राप्त दुनाटपरी बनाउने तालिमबाट आफूहरु आत्मनिर्भर बनेको बताउनुभयो । उहाँले भन्नुभयो, “यसभन्दा पहिले हामी घरको काममा मात्र सीमित थियौँ । जब दुनाटपरी बनाउने तालिम लियौँ, त्यसपछि कमाइ राम्रै छ ।”
दिनमा एक हजार दुना र ३०० जति टपरी उत्पादन गर्दैआएको उहाँले बताउनुभयो । जसबाट मासिक ३० हजार जतिको कारोबार हुनेगरेको छ । दुना सानो साइजको ७० पैसा, एक नम्बरको ८०, दुई नम्बरको एक, तीन नम्बरको डेढ रुपियाँ र टपरी साढे तीनमा बिक्री गर्ने गरेको उहाँले बताउनुभयो ।
दुनाटपरी बिक्री गरी प्राप्त पैसा समूहमा जम्मा गर्ने गरेको अर्की सञ्चालक कमला चौधरीले बताउनुभयो । यसरी समूहमा जम्मा गरेको पैसाले आपतविपद्, गाह्रो, अप्ठ्यारो तथा घरायसी समस्या आइपरेको खण्डमा ठुलो समस्या टर्ने गरेको उहाँको भनाइ छ ।
दुनाटपरी कारोबारबाट दुई वर्ष यता समूहमा बचत गरेको ६० हजारका दरले एक जनाको भाग परेको उहाँले बताउनुभयो । “सुरुमा कामको खोजीमा थियौँ, के गर्ने, कसो गर्ने भन्ने अन्यौलमा थियौँ” उहाँले भन्नुभयो, “जब वडाबाट तालिम लियौँ आफ्नो हातमा सीप भइसकेपछि हिजोआज ढुक्कले घर खर्च चलिरहेको छ ।” सुरु सुरुमा दुनाटपरी बिक्रीका लागि समस्या हुने गरे तापनि हिजोआज समस्या नभएको समूहकी सविता चौधरीले बताउनुभयो ।
