फ्रान्कफर्ट, जर्मनी, साउन ८ गते । युरोपेली केन्द्रीय बैँकले बिहीबार ब्याज दरलाई अपरिवर्तित राख्ने तयारी गरेको छ । नीति निर्माताहरूले अमेरिकी राष्ट्रपति डोनाल्ड ट्रम्पद्वारा घोषणा गरिएको उच्च अमेरिकी करहरूको कारण युरा क्षेत्र प्रभावित हुने सम्भावनालाई मध्यनजर गर्दै करको दर पूर्ववत कायम गर्ने तयारी गरिरहेका छन् ।
यसले गत वर्षको सेप्टेम्बरमा सुरू भएको ब्याजदर कटौतीको श्रृङ्खलालाई अन्त्य गर्ने छ । इसिबीले बढ्दो मुद्रास्फीतिको प्रतिक्रियामा उधारो लागतलाई क्रमिक रूपमा घटाएको छ । उपभोक्ता मूल्य वृद्धिको गति केन्द्रीय बैँकको दुई प्रतिशतको लक्ष्यको वरिपरि स्थिर भएको छ । कोरोनाभाइरस महामारी र युक्रेनमा रूसको आक्रमणपछि दुई अङ्कको उच्च विन्दुमा पुगेको छ । तर ट्रम्पद्वारा निर्धारित अमेरिकामा युरोपेली निर्यातमा दण्डात्मक करको कार्यान्वयनका लागि अगस्ट १ को समयसीमाका कारण तुलनात्मक रूपमा अधिक अनुकूल मौद्रिक नीतिको अवस्था कमजोर बनेको देखिन्छ । यद्यपि, सम्झौताको लागि वार्ता अघि बढेको छ ।
स्थानीय समयअनुसार १२:१५ मा इसिबीको निर्णय हुनुअघि युरोपेली आयोगका प्रवक्ताले संयुक्त राज्य अमेरिकासँग सम्झौता ‘पहुँचभित्र’ रहेको बताएका थिए । इयूका कूटनीतिज्ञहरूले बुधबार अमेरिकाले १५ प्रतिशत करका लागि सहमत भएको तर त्यसबारे थप छलफल भइरहेको बताएका छन् । व्यापार विवादको समाधान वा वार्ताको असफल अन्त्यको पर्खाइमा रहेको इसिबीले आफ्नो अर्को कदम चाल्नुअघि ‘थप स्पष्टता’ चाहेको युनिक्रेडिटका विश्लेषकहरूले बताएका छन् ।
-पर्ख र हेरको नीति-
गत वर्षको जुनमा गरिएको कटौतीसहित कुल आठ कटौती गरेको इसिबीले मुद्रास्फीति श्रृङ्खलाको बिचमा चार प्रतिशतको उच्च विन्दुबाट आफ्नो प्रमुख कर्जा दरलाई दुई प्रतिशतमा झारेको छ । जर्मन सार्वजनिक ऋणदाता केएफडब्ल्यूका प्रमुख अर्थशास्त्री डर्क शुमाकरका अनुसार आर्थिक तथ्याङ्क वा मूल्य गतिशीलता सम्बन्धी नवीनतम तथ्याङ्कले इसिबीबाट तत्काल प्रतिक्रिया आउनुपर्ने बताएको छ ।
युरोक्षेत्रमा मुद्रास्फीति जुनमा ठीक दुई प्रतिशतमा झरेको थियो र बढ्दो कारखानाजन्य उत्पादनसहित आर्थिक सूचकहरूले अर्थव्यवस्थाको स्वास्थ्यको बारेमा थप आशावादी हुन प्रोत्साहित गरेको छ । बेरेनबर्गका विश्लेषक फेलिक्स स्मितले भन्नुभयो, “यदि ट्रम्पले कठोर करहरू लागु गरेमा इसिबीले ‘आपतकालीन अवस्थामा पर्ख र हेरको नीति कायम राख्न’ चाहन्छ ।” “व्यापार विवादमा थप वृद्धिले यूरो क्षेत्रको अर्थव्यवस्थामा अर्थपूर्ण नकारात्मक प्रभाव पार्ने छ,” स्मितले भन्नुभयो ।
कर नीतिको अनिश्चितताको परिणाम स्वरूप डलरको तुलनामा यूरोको बढ्दो शक्तिले नीति निर्माताहरूलाई इसिबीको मौद्रिक नीतिको अडानलाई अझ नरम बनाउन प्रोत्साहित गर्न सक्छ । ट्रम्पको अकर्मण्य नीति निर्माण र अमेरिकी फेडरल रिजर्भमाथिको आक्रमण र अमेरिकी सम्पत्ति खर्च गर्ने लगानीकर्ताको कदमका कारण यस वर्षको सुरुदेखि नै डलरको तुलनामा युरो करिब १४ प्रतिशतले बढेको छ । रासस/एएफपी
