अविनाश चौधरी
धनगढी, साउन ४ गते । जनताको घरदैलोसम्म विकासको जिम्मेवारी बोकेका कैलालीको स्थानीय तहहरू विकास अर्थात पुँजीगत बजेट खर्च गर्नमा पछाडि देखिएका छन् ।
चालु बजेट खर्च प्रगति राम्रो गरेका स्थानीय तहहरूले पुँजीगत बजेट भने चालुको तुलनामा कम खर्च गरेका हुन । पालिकाहरूले सार्वजनिक गरेको आर्थिक वर्ष २०८१/८२ को वित्तीय प्रगति विवरण अनुसार प्रायः सबै स्थानीय तहको चालु बजेट खर्च प्रगति बढी र पुँजीगत बजेट खर्च प्रगति कम रहेको छ । पालिकाहरुले बजेट पनि चालुमा बढी र पुँजीगतमा कम विनियोजन गरेका थिए ।
पुँजीगत बजेट एक अर्ब १६ लाख विनियोजन गरेको धनगढी उपमहानगरपालिकाले ६२ करोड ९९ लाख (६२.८९ प्रतिशत) खर्च गरेको छ । यो पालिकाले चालुतर्फ एक अर्ब २१ करोड ६१ लाख रुपियाँ बजेट विनियोजन गरेको थियो । जसमध्ये एक अर्ब एक करोड ६२ लाख खर्च भइ वित्तीय प्रगति ८३.५६ प्रतिशत पुगेको छ । कुल दुई अर्ब २१ करोड ७८ लाख बजेट धनगढी उपमहानगरपालिकाको थियो । जसमध्ये एक अर्ब ६४ करोड ६२ लाख (७४.२२ प्रतिशत) खर्च भएको छ ।
२२ करोड ५८ लाख पुँजीगत बजेट विनियोजन गरेको मोहन्याल गाउँपालिकाले १७ करोड ७० लाख (७८.३७ प्रतिशत) खर्च गरेको छ । चालुतर्फभने ३२ करोड ७५ लाख रुपियाँ विनियोजन गरिएको थियो । जसमध्ये २९ करोड ४३ लाख (८९.८६ प्रतिशत) बजेट खर्च गरिएको छ ।
बर्दगोरिया गाउँपालिकाले पुँजीगत बजेट १३ करोड ९३ लाख (७५.१४ प्रतिशत) खर्च गरेको छ । पुँजीगततर्फ १८ करोड ५३ लाख विनियोजन गरेको यो पालिकाले चालुतर्फभने ३१ करोड ६९ लाख रुपियाँ बजेट विनियोजन गरेको थियो । चालु बजेट २९ करोड ४५ लाख (९२.९५ प्रतिशत) खर्च गरिएको छ।
त्यस्तै, २१ करोड ७३ लाख पुँजीगततर्फ विनियोजन गरेको गौरीगङ्गा नगरपालिकाले १३ करोड ३८ लाख (६१.६१ प्रतिशत) मात्रै बजेट खर्च गरेको छ । चालुतर्फ भने विनियोजित कुल ५२ करोड ५९ लाखममध्ये ४५ करोड ८८ लाख (८७.२५ प्रतिशत) बजेट खर्च गरिएको छ ।
यसैगरी, जोशीपुर गाउँपालिकाले १८ करोड ४५ लाख पुँजीगत बजेटमध्ये १३ करोड ४ लाख (७०.६७ प्रतिशत) खर्च गरेको छ । यो पालिकाले चालु बजेट भने २९ करोड ६८ लाख (८६.२२ प्रतिशत) खर्च गरेको छ । चालुतर्फ कुल ३४ करोड ४२ लाख रुपियाँ बजेट विनियोजन भएको लेखा अधिकृत टिपेश तिमिल्सिनाले जानकारी दिनुभयो ।
