रामकृष्ण बोहरा
बागलुङ, असार ३१ गते । अन्न भण्डारको रूपमा परिचित बागलुङ नगरपालिका –१३, बलेवाको दम्कफाँटमा लिफ्ट सिँचाइ आयोजनाबाट पानी आउन थालेपछि किसान उत्साहित भएका छन् ।
दम्कफाँटमा कालीगण्डकी नदीको पानी लिफ्ट गरेर सिँचाइ गर्ने आयोजनाको काम चलिरहेको छ । झण्डै चारसय किसानको खेत रहेको दम्कफाँटमा लामो प्रयासबाट पानी आइपुगेपछि धान रोप्न पाउने आशा पलाएको दम्कफाँट सिँचाइ आयोजना उपभोक्ता समितिका अध्यक्ष ओमबहादुर पौडेल क्षेत्रीले बताउनुभयो ।
आयोजना समयमै नसकिँदा यो वर्ष पर्याप्त सिँचाइ सुविधा नपुगेको क्षेत्रीको भनाइ छ । सिँचाइ अभावमा खेत बाँझै छाडेकाहरूमा अब रोप्न पाइने आशा जागेको क्षेत्रीले बताउनुभयो ।
सिँचाइ तथा जलस्रोत व्यवस्थापन आयोजना कास्कीमार्फत २०८० सालमा आयोजनाको काम सुरु भएको थियो । कालीगण्डकी नदीमा समवेल बनाएर ४ वटा पाइपबाट हरेक दिन तीन घण्टाको दरले पानी तान्ने योजनाअनुसार काम भइरहेको छ ।
तीन करोड लागतको आयोजनामा पपैया बिएससी संयुक्त निर्माण कम्पनीले झण्डै आधा रकम कम मूल्यमा ठेक्का लिएपछि आयोजना पूरा नभएको हो ।
गत हिउँदमै सकिनुपर्ने काम अधुरो हुँदा तत्कालको सिँचाइका लागि स्थानीयले श्रमदान गरेर काम चलाएको अध्यक्ष क्षेत्रीले बताउनुभयो ।
क्षेत्रीका अनुसार, ३२ लाख रुपियाँ बराबरको प्राविधिक काम उपभोक्ताले गरेका छन् । पर्याप्त सिँचाइको सुविधा भएमा दम्कफाँटमा १७ हजार मुरी धान फल्ने क्षेत्रीले जानकारी दिनुभयो ।
पहिलो चरणमा यो आयोजनाबाट २१ हेक्टर जमिन सिँचाइ गर्ने लक्ष्य छ । त्यसपछि बढाएर लैजाने समितिका अध्यक्ष क्षेत्रीले बताउनुभयो । हाल कालीगण्डकी नदीमा ४५ फिटको समवेल बनिसकेको छ । त्यस बाहेक ४ सय ८५ मिटर उचाइमा पानी पठाएर कालीढुङ्गामा ८५ हजार घनलिटरको स्टेप ट्याङ्की बनेको छ ।
उक्त पानीलाई पैयुपाटा लगेपछि वितरण ट्याङ्कीमार्फत दम्कको फाँटमा ७५ ओटा गेटबलमार्फत १० मुख्य र १ सय ३१ वटा साना मुहान बनाउनुपर्ने छ ।
अहिलेसम्म मूल ट्याङ्कीमा पानी पुगेको छ । दम्कफाँटमा व्यवस्थित पानी वितरणका लागि पाइपलाइन बिछ्याउने काम बाँकी छ ।
दुई पटक म्याद थपेर ठेकेदार कम्पनीले आगामी चैत मसान्तभित्र काम सक्ने लक्ष्य राखेको छ । आयोजनाका इन्जिनियर विशाल थापाले आयोजनाको मुख्य भाग सम्पन्न भएकाले साना काम छिट्टै सम्पन्न हुनेमा विश्वस्त रहेको बताउनुभयो ।
